唱新歌High爆勁舞 欣宜驚身體餘震企唔穩

鄭欣宜、Gin Lee（李幸倪）、AGA（江海迦）及菊梓喬等歌手，昨日出席籌款節目《博愛歡樂傳萬家》記者會，部分歌手更是無綫與三大唱片公司破冰後，首次亮相無綫騷。欣宜近日推出跳舞新歌《@princejoyce》，節目當晚將與幾位男舞蹈員一同跳唱︰「呢首歌第一次唱live，我已經命令一班男dancers扮韓國oppa去配合我。」她笑言屆時又唱又跳又趴地︰「我最尾個動作要好型咁企喺度，我都驚到時身體某啲部位有餘震，到時會企唔穩！」

欣宜透露當晚亦會跟鄭融、王灝兒（JW）及泳兒互唱代表作，她搞笑說︰「我最擔心唱和音嘅部分，我呢啲天生主音嚟㗎嘛！」另外，提到欣宜早前自爆患社交焦慮症，她表示已有好轉︰「我仲好怕去好多陌生人嘅地方，但情況唔算嚴重，亦唔使食藥。」

採訪︰Pauline