新年無見過 薛家燕召喚「緋聞男友」坤哥返港

薛家燕前晚錄影《流行經典50年》，提到經常口花花撩家燕姐的吳業坤（坤哥）正身在日本浪遊，家燕姐搞笑隔空召喚「緋聞男友」回港：「我都掛住坤哥，快啲返嚟做嘢喇！」

薛家燕前晚提到吳業坤目前身在日本，更正在挑戰「東海道五十三次」，由關西行路去關東，家燕姐搞笑說：「今年新年都唔見佢嚟拜年，我哋無聯絡，我慳番封利是。」家燕姐更即場講日文跟坤哥隔空打招呼：「我唔知佢喺日本，佢淨係同我講佢周遊列國，坤哥你好快啲返嚟做嘢喇。」她笑言對住鏡頭，一定要說掛念坤哥：「我唔想年輕人傷心呀！」她又搞笑鼓勵坤哥結識日本女友。

變身緊張奶奶

另外，提到新抱上月宣布有喜，家燕姐自爆已變成緊張奶奶：「新抱反而叫我唔好咁緊張，因為我成日買補品畀佢，其實佢自己都有，又補唔到咁多。我身邊好多朋友都想送禮物畀BB，又好關心BB性別，不過阿仔同新抱話遲啲舉行公布儀式，所以連我都未知（BB性別）。」

家燕姐透露新抱預產期在五、六月：「我哋已經請咗兩個陪月，新抱都好乖，晚晚九點幾就瞓覺。」她笑言已推掉五月到六月的工作，到時專心幫手湊孫：「我負責整薑醋，我已經準備咗自家品牌嘅薑醋做生意，配合個孫出世時推出。」

採訪︰Pauline

攝影︰林良明

美術：梁政敏