Bob林盛斌憶朱慧敏婚禮做「外父」似嫁女 樂於做媒人：成人之美係好事

朱慧敏與心臟科醫生陳良貴（Jason）於今年1月結婚，當時媒人林盛斌（阿Bob）更化身「外父」陪伴新娘子進場。Bob對這對夫妻而言，是兩人生命中重要的人。昨日三人一齊開live，大爆三人相識淵源，Bob更自爆好鍾意做媒人！

{{hket:inline-image name="bob3.png"}}{{/hket:inline-image}}

Bob指與朱慧敏是以前在電視台認識的，「工作、公開場合撞到都會傾幾句，當時唔算好close，到真係有交流係因為一張相。」而朱慧敏指因為當時send完一張相畀佢之後又再開始返對談：「佢又問我有冇拍拖、鍾意咩男仔，好關心我。」她更好感激有Bob呢位有情有義嘅朋友，「喺TVB無正式合作過，但我每次有新聞都會簡單問候我，又介紹我去大陸做嘢拍戲。第一次有正式對話係Big Boys Club訪問，令佢了解多咗我。」

Bob又大讚朱慧敏係好女仔：「自從佢同上一個(男朋友)關係完結咗，我就覺得呢個女仔幾唔錯，中間有叫佢開放吓自己，認識吓新朋友，佢就成日話諗吓先，未遇到。咁我就將呢件事擺入心入面。」

{{hket:inline-image name="61513144_464773034259205_132258656300193620_n_600.jpg"}}{{/hket:inline-image}}

而Bob與Jason是二十幾年前一個電台節目認識的，當時有十幾個醫生，Jason係唯一一個冇拍拖。「 佢話佢冇女朋友，咁又將呢件事擺入心入面。」Bob比喻兩位為小種子：「之後我將呢兩個小種子擺係盤栽入面，想假以時日再將兩人擺埋一齊再淋吓水、灌溉吓。睇吓可唔可以開花結果，健康快樂成長。」

朱慧敏指Bob一路都有介紹唔同男仔畀佢識；又有介紹唔同女仔畀Jason識。「佢問我理想型男朋友要有咩條件，我話唔煙唔酒唔講粗口。 佢開頭話個條件好難，話得一個人選(Jason)，你得就得，唔得就唔得。」

{{hket:inline-image name="266.jpg"}}{{/hket:inline-image}}

相識一段日子之後，朱慧敏與Jason決定結婚，就即時FaceTime身為媒人的阿Bob講喜訊，朱慧敏指：「佢聽到我哋打算結婚嗰時，我哋三個都眼濕濕。我又誠意邀請佢做walk me in嗰個人，但我就叫佢諗一諗，會唔會想留番第一次畀囡囡。」 Bob就即應承：「梗係好榮幸啦，真係好似嫁女咁，好感動！」

Bob又表示好開心見到佢哋係疫情下完婚，「婚禮好感動。睇番相，見到我將你哋手放埋一齊；又見到你哋一齊步向人生另一個舞台 ，好正㗎！」

（↓點擊放大睇圖片↓）

Bob在圈中人緣甚廣，更樂於做媒人撮合單身的朋友們。「我好鍾意做呢啲嘢，有人問我你成日幫人做撮合係為啲咩？我話唔係講錢，我覺得如果真係可以令我身邊朋友幸福快樂，令佢哋遇到適合度過餘生嘅另一半，對我嚟講係好大嘅恩賜。」

他續指如果可以成人之美，自己其實都好美好：「如果係感情路上有人幫助你，令你哋好幸福。呢個都係一個恩德，係一件好事。 」

{{hket:inline-image name="bob.png"}}{{/hket:inline-image}}

39歲朱慧敏嫁陳良貴名醫圓婚 Bob媒人變「外父」拖新娘出場 【下一頁】