爆未婚夫水底求婚 李施嬅收鑽戒有鯊魚見證

李施嬅上月宣布訂婚，原來她的未婚夫正是星級健身教練車崇健（Anson Cha），有指男方身家豐厚，絕對是城中筍盤。施嬅昨日首度以準人妻身份現身公開活動，人逢喜事精神爽的她，提到未婚夫即冧爆甜笑，又透露獲未婚夫在水底求婚，認真浪漫過人。

李施嬅昨日一身花花look到銅鑼灣出席展覽活動，提到婚事進度，施嬅坦言受疫情影響而未落實︰「我媽咪仲喺加拿大，如果屋企人飛嚟香港，真係要睇清楚疫情發展，加上未婚夫家人喺美國，暫時仲未知婚禮喺邊度搞。」她笑言早認定未婚夫Anson是終身伴侶，所以註冊、婚禮等儀式並不重要︰「我拍戲都成日拍結婚場面，如果正式嘅婚禮，希望簡單、屋企人開心就得。咁啱我家姐最近都宣布結婚，佢婚期早過我，我爸爸最開心，一次過嫁晒兩個女。」

施嬅與Anson拍拖四年，提到戀情一直保持神秘，施嬅坦言︰「未婚夫怕醜，所以想低調啲，但其實一直想公開。有次佢去茶餐廳，有相熟嘅食客同老闆恭喜佢，佢都有啲驚同緊張，所以等佢慢慢適應。」雖然未婚夫有周潤發、郭富城等星級學生，不過施嬅笑說︰「未婚夫無正式做我嘅教練，如果真係教我，我諗我哋會嗌交。」

未來老公超勤力

提到Anson的優點，施嬅滔滔不絕︰「佢個人好簡單、細心，佢好錫我，好支持我追求夢想，亦無阻止我繼續喺呢行發展。不過佢個人真係好勤力，唔鍾意懶人，所以未來一世我都要好勤力。（造人方面一樣要勤力？）順其自然啦，雖然我好鍾意小朋友，但我哋唔急生BB。」施嬅透露與Anson各有自己的居所，不過目前正處於半同居狀態。

至於Anson的求婚過程，原來甚有心思及浪漫，令施嬅畢生難忘。施嬅冧爆說︰「我哋有次去美國潛水，佢喺水底突然拎出戒指向我求婚，當時我哋側邊仲有好多鯊魚，我覺得好有心思，因為佢知我鍾意海。」有指Anson是網紅Brian Cha（車志健）的弟弟，施嬅只表示可以大方分享她與未婚夫的關係，但盡量避免提到其他人。

採訪︰Pauline

攝影︰林良明

美術︰梁政敏