【聲明】港生活網站並無進行電話推廣活動

地獄黑仔王獲認證 張振朗台慶綵排差啲死

發佈時間: 2021/03/16

張振朗、譚俊彥及朱敏瀚日前接受《Master's Talk師父有請》訪問,振朗獲主持麥玲玲認證為黑仔王,不但受黃心穎所累,拍下三部劇集一度被抽起;振朗更試過在台慶綵排差點「中頭獎」而死,幸好「連環不幸事件」已過,他笑言以視帝為努力目標。

三位型男在節目中大談「命中貴人」,譚俊彥笑言在事業上的貴人多為女性,而朱敏瀚則視張振朗為貴人︰「有段時間經濟唔係咁好,我想考健身教練牌,點知振朗鬧我,話做演員最緊要係信念。」不過振朗有「地獄黑仔王」之稱,前年受黃心穎「安心事件」所累,主演的三部劇集一度被抽起,連麥玲玲都笑他相當黑仔。但振朗坦言無怪心穎︰「從來無覺得係連累,但唔開心就梗係有啦。」但朱敏瀚笑說︰「我同振朗拍完《機場特警》,佢都叫我小心啲,幫幫忙唔好再有咩新聞。」

隨後,譚俊彥大爆振朗黑仔事件簿︰「連綵排都有支燈跌落嚟,就撞中振朗!」振朗指當時正值台慶綵排,頭上有一部用威也吊住的攝影機︰「我講緊對白,突然聽到『小心』呢兩個字,然後部機跌落我膊頭,我就入咗醫院。如果唔係無啦啦企右一步,可能就跌正落我塊面。」

朱敏瀚不甘主持《都市閒情》

提到入行辛酸,振朗與譚俊彥均自爆曾被睇死,譚俊彥說︰「我試過演喊戲喊唔出,被睇死話我生活太幸福,話我未捱過就梗係喊唔出,咁我咪返去對住塊鏡練習囉!」至於振朗初入行時,亦被前輩批評︰「你呢啲樣做唔到男主角。」朱敏瀚則坦言初入行時被安排到《都市閒情》,一度心有不甘︰「我好大膽,直接同監製講我只想拍劇,我有劇就走。當時安德尊感覺到我唔係好想做,但佢叫我努力,點都會拎到啲嘢走。我學識咗一係唔好接,接咗嘅工作就要盡力去做好佢。」

撰文︰Iris

美術︰梁政敏

地獄黑仔王獲認證 張振朗台慶綵排差啲死

(左起)朱敏瀚、張振朗及譚俊彥大談事業上遇上的貴人。

地獄黑仔王獲認證 張振朗台慶綵排差啲死

張振朗不覺受黃心穎拖累。(資料圖片)