電影版《尋秦記》｜林峯廿年後滅六國追殺師傅一家 古天樂Full Gear開槍回到未來？

於2001年播映嘅無綫神劇《尋秦記》20年後搬上大銀幕，而電影版《尋秦記》首條宣傳片終於登場，除咗有原班人馬包括古天樂、林峯、宣萱、郭羨妮、滕麗名外，連配角廖啟智、歐瑞偉、黃文標同鄧一君嘅角色都連戲，唔少觀眾都大讚呢齣延續版真係做到足，非常期待咁話！

{{hket:inline-image name="1.JPG"}}{{/hket:inline-image}}

電影《尋秦記》同電視版《尋秦記》相隔20年，一眾演員都keep得唔錯，宣傳片中嬴政（林峯飾）眼神兇狠登場，咁講：「邊個唔信我，本王就殺邊個！」之後項少龍（古天樂）拎住手槍，同嬴政喺煙霧樹林追逐，項少龍問︰「你可唔可以放過我一家人？」嬴政隨即回應︰「如今係你家鄉嘅人唔放過寡人，你仲有當寡人係徒弟咩？」最後畫面嬴政揮劍刺向項少龍說：「所有恩怨從此了斷！」

{{hket:inline-image name="159902865_4105917736093430_1520263979076410227_o.jpg"}}{{/hket:inline-image}}

唔少網民睇到片段，聽到主題曲已經話好興奮，引起熱烈討論，有人話嬴政皮膚冇以前咁黑，亦有人認出項少龍電影中所穿嘅T恤，當年喺劇都出現過！其實齋睇片真係有唔少問號，到底項少龍點解可以full-gear出現？係咪曾經穿越過去、未來？項少龍個仔項羽又係邊個演？真係未放映先興奮呀！

(點擊圖片放大)

當年電視劇結局講到項少龍唔可以回到自己身處的現代，於是喺秦國落地生根，仲同宣萱飾演嘅烏廷芳誕下西楚霸王項羽。但20年後電影版項少龍帶住一家人逃難，朱鑑然飾演佢嘅兒子項寶兒，未知係項少龍幫阿仔改咗名定係佢再添丁呢？

而嬴政口中「你家鄉嘅人」就係新加入嘅關鍵人物Ken。Ken因為曾坐冤獄，而令佢誓要回到古代成王，以彌補因冤獄而失去嘅人生！而項少龍一家雖歸隱田園，但一舉一動仍被嬴政監視；正當嬴政一統六國，以為平定天下之時，遇上Ken嘅突襲，令佢不得不搵佢師傅項少龍「幫拖」。Ken嘅身分仲係個謎，而網上流出嘅演員名單中，特別演出嘅演員有林家棟、苗僑偉及同張繼聰，相信Ken一角同佢哋有關，唔知項少龍嘅一身重型裝備又係咪同Ken有關呢？