李泳豪終於「脫單」 舊愛楊思琦送祝福

現年40歲的李泳豪與楊思琦於02年拍劇集《血薦軒轅》撻着，可惜拍拖九年後，有指楊思琦移情別戀前港隊跳水運動員吳帥，並單方面宣布分手，令豪仔受盡情傷。雖然後來豪仔曾與洪天明舊愛、中韓混血模特兒Miki拍拖，但最後分手收場，豪仔更dry足九年，直至昨日才被爆戀上圈外新歡Agnes。

有指Agnes跟豪仔同是愛狗之人，賢良淑德之餘，對豪仔十分細心，甚得李家上下歡心。李家鼎昨日接受《晴報》訪問時，承認已見過兒子新歡︰「見過一、兩次。（好鍾意Agnes？）OK吖，幾斯文。」問到豪仔和Agnes拍拖多久？鼎爺說︰「個幾月啩，鬼知咩，小朋友嘅嘢。不過戥佢開心嘅，最緊要佢自己鍾意！」楊思琦則透過短訊向舊愛送上祝福︰「祝福每一位都開心、幸福、平安！」