愉景新城穿越江戶時代 歎盡日式小吃

今年復活節唔可以外遊，黛安真係好掛住各地嘅美食。聽聞荃灣D‧PARK愉景新城由下星期六（27日）起，一連3個月將化身成「飛驒小京都」嘅高山老街。越過「高山古い町」大手門，就好似穿越至江戶時代，可以歎盡14款日式小吃。

聽公關姊妹講，今次商場會布置成古色古香嘅高山街屋第，重塑富濃厚特色嘅江戶風情。「高山古い町」大手門仲設有日式小商店同日式人力車，打卡一流！

行入高山老街就會見到日式老房一字排開，場內準備咗超過14間日式小吃攤，最名貴嘅有高山名物飛驒牛食材，例如和牛壽喜燒，其餘美食仲有各式日本串物、玉子燒、大阪燒、關東煮等。最後當然要以甜品配茶作結，場內有齊培茶、煎茶、抹茶、玉露任君選擇，更提供鯛魚燒雪糕、銅鑼燒、日式清酒雪糕等，用日本原材料製作，冰涼可口，絕對係解膩之選。

活動間期逢周末及假日，場地仲會加推「宮川朝市周末市集」，超過40檔商戶發售日本雜貨及人氣食品，真係好似去咗日本旅行咁。