想獨個兒出遊享受自由 洪永城拉攏女友跟發哥跑山

洪永城日前到九龍城歎咖啡時，巧遇周潤發及黃日華，他跟兩位前輩合照後放上網，引來不少圈中好友及網民妒忌。眼見發哥帶領的「星級跑山團」愈跑愈起勁，洪永城表示想拉攏女友梁諾妍跟發哥一起跑山，認真廿四孝男友。

洪永城昨日到中環出席活動，疫情下已有一年多無去旅行的他，直言若果通關，相信公司會第一時間安排他拍攝旅遊節目，他更計劃好主題。洪永城說︰「大把題材可以拍，好似疫情後嘅新常態下點樣去旅行，疫情下嘅愛情故事又得。（同女友一齊拍？）呢個層面太複雜，因為大家唔同公司，但我都想嘅。其實自己拍YouTube片係無問題，我哋兩年前去緬甸旅行都拍咗片，原本想放喺我哋個網播放，但撞啱緬甸政變，所以要押後。」

不過洪永城坦言疫情後想獨自去旅行，他解釋︰「疫情下大家咁緊密相處，所以要有啲自由時間同空間，保持呢個距離，之後再見面，熱情又返番嚟。就算已婚，我都建議各自去旅行，只係返嚟唔知使唔使跪玻璃啫。」

爆偶像主動集郵

另外，洪永城日前巧遇發哥和黃日華，他開心說：「我去飲咖啡，坐坐下見佢哋入嚟，但唔想打搞，所以臨走時行過去打個招呼，發哥就話坐低飲杯糖水。我問發哥有無睇《陀槍師姐2021》，佢話呢排行山行得多所以無睇，但華哥有睇少少。（約佢哋行山？）佢哋跑山好勁㗎，華哥話初時跟發哥行山搞到喘晒氣。（拉攏女友跟發哥跑？）都可以諗下，我都有介紹我女友係跑步專家，叫發哥留意下佢。」不少人羨慕他捕獲發哥，洪永城說︰「我算遲啦，好多人野生捕獲佢好多年啦，我第一次咋。（發哥主動集郵？）係呀，當時好似世界停頓咗幾秒，一個國際巨星同你講，可唔可以同你影張相，我覺得係咪發緊夢。」

採訪︰倪小珊

攝影︰林良明

美術︰梁政敏