【聲明】港生活網站並無進行電話推廣活動

生仔煩惱多 岑麗香驚囝囝被女朋友搶走

發佈時間: 2021/03/23

懷有第二胎的岑麗香,昨日挺住巨肚為代言的補身飲品拍攝廣告。育有兩歲兒子Jacob的香香,第二胎又是男仔,預產期在五月頭的她,已經擔心寶貝仔會被將來的女朋友搶走,她更自我安慰說︰「起碼喺佢有女朋友之前,我都係佢最錫嘅女人。」

現時懷有七個半月身孕的香香,透露今胎比懷第一胎時辛苦︰「因為同時要照顧大仔Jacob,佢成日都想玩,所以我攰過上一次,不過都OK嘅,我會盡力陪佢,唔想忽略佢,想畀佢知道雖然有第二個,但佢都係被錫嗰個。」香香不想Jacob在弟弟出世後呷醋,故積極閱讀育兒書找方法︰「我學到畀大仔第一次見到BB時,要放BB喺床仔,唔好抱住BB,同埋搵個玩具話係BB送畀哥哥,等佢開心啲易接受。但我啲朋友話其實點都會呷醋,所以睇住嚟啦!」

香香上一胎是順產,今胎亦計劃順產生B︰「我怕開刀,如果醫院條例可以,都想老公陪我入產房,始終有人喺身邊支持會開心啲。」有說孕婦不能吃生冷食物,但香香卻分享飲凍果汁的相片,她笑言︰「我有盡力戒口,好似海鮮或者生冷嘢,但我覺得間唔中都要畀自己輕鬆下。就算我做咗曳嘢,例如飲凍嘢,都會隔一段時間先做,唔會太多。」

自嘲一孕傻6年

搞笑的香香更自爆擔心兩個囝囝將來被女朋友搶走︰「原先覺得有囝囝會少啲嘢擔心,只係驚佢第時有女朋友就唔理我,依家盡量享受先,唔好諗咁遠,到真係發生時就交畀老公,叫佢錫番我多啲!」有說一孕傻三年,香香被發現將手錶調轉戴,她笑指︰「我個腦都調轉咗,呢段時間唔記得好多嘢,啲人同我講完,我轉頭唔記得又要問多次。嗰日調轉咗隻錶,發現咗都覺得傻傻哋,啲人話一孕傻三年,我要傻六年先得,請大家體諒下!」

採訪︰倪小珊

美術︰梁政敏

生仔煩惱多 岑麗香驚囝囝被女朋友搶走

香香擔心大仔Jacob呷BB醋。(資料圖片)

生仔煩惱多 岑麗香驚囝囝被女朋友搶走

香香破戒喝凍飲,更將手錶調轉戴。(資料圖片)