近日鍾嘉欣為積極催谷其YouTube頻道而密密po片，繼早前與王君馨在街頭busking後，她再上載與多年粉絲Queenie傾心事的真情對話part 2片段。嘉欣回想在早年搏殺時期，面對排山倒海的工作只懂不停做︰「我性格有少少似牛，公司叫我做乜咪做，仲有第二個選擇咩？」
15年與脊醫男友Jeremy結婚的鍾嘉欣，婚後育有四歲女兒Kelly及兩歲兒子Jared，家庭生活美滿。雖然一家人現時長居加拿大溫哥華，但嘉欣近年也抽時間回港出席活動。去年中，她更在新冠肺炎疫情陰霾下回港拍劇過戲癮，聯同鄭嘉穎、馬國明、周家怡等合作《星空下的仁醫》。嘉欣又開設了個人YouTube頻道，與粉絲、網友互動，早前她與忠實粉絲Queenie拍足兩集短片，part 1中二人一邊歎美食，一邊談偶像與歌迷之間的舊事，嘉欣更講到眼濕濕。而日前發布的part 2，曾獲封「BB」的她，特別回帶以前在無綫備受力捧背後的辛酸史。
呻早期密密做唔識Say No
嘉欣透露以前是一個很聽公司話的女生，她語帶無奈道︰「你（公司）叫我做乜，我就會去做，我完全無『no』呢一個字，其實我性格有少少似牛，公司叫我做乜咪做，仲諗咩？仲有第二個選擇咩？無！」她又坦言︰「做到自己攰到爆、病呀、精神分裂咁。」不過嘉欣笑言最喜歡的劇集作品，就是08年與馬浚偉合作的《金石良緣》。她特地傳授面對壓力的技巧︰「逆境每一個人都會遇到，你有面對分岔路，一條就係你覺得『係嘅，學多啲經驗』，你會好珍惜過程，能夠苦難時搵到喜樂，或者吸收到智慧；但如果當你揀咗負面嘅路，會好容易走入一個受害嘅狀態，『我好慘、我唔值得』嘅狀態，慢慢愈來愈負面，會錯過一個成長機會，愈嚟愈慘。」
感恩大女皮膚白似老公
嘉欣認為人生有時難以重回正軌，因此鼓勵大家，如果遇上兩條不同的路，無論如何也要走下去︰「有啲事要發生，你就畀佢發生。」另外，嘉欣大談一對仔女，她笑指大女Kelly出世時極似丈夫Jeremy，當粉絲Queenie讚Kelly愈來愈似媽咪時，嘉欣即興奮地稱︰「其實我覺得Kelly似晒兩個，因為我老公有少少混血樣、有特別氣質，個女似我老公皮膚白。不過囡囡都似我咁精靈活潑，講嘢、性格都好似我！」不少粉絲在影片下留言，大讚兩集真情對話夠感動；亦希望嘉欣要多多出片大爆舊事。
撰文︰Steven
美術︰梁政敏