【煤氣費貴】點解呢個月煤氣費特別貴？要定時自己報錶？一文解答用煤氣疑問（下）

網上周不時都有唔少人討論煤氣費，通常都係問點解突然收貴咁多，尤其疫情下用量靠估，張單用量同煤氣錶可能唔同。不過用得煤氣（主要係指熱水爐）就預咗貴，但如果用戶一直唔睇吓個煤氣錶，加上疫情無人上門抄錶，用戶可能一直畀多咗都唔知，所以今次就講吓報錶有關事宜。

Q1：用煤氣點解要報錶？
A：煤氣收費係計讀數，度數換算做兆焦耳就可以計出煤氣費，公式係1度 = 48兆焦耳。一般來講，正常家庭每個月用10幾至30幾度不等。如果唔係新樓，大部分用戶都未有自動報錶系統，需要等抄錶員上門抄錶，或者自己報錶，咁樣收費會更準確。

{{hket:inline-image name="0325WLfeaturepage878.jpg"}}{{/hket:inline-image}}

Q2：一直唔報錶，會唔會收多咗錢？
A：都幾有可能，因為疫情煤氣公司已暫停入戶抄錶服務，因為煤氣錶喺室內，煤氣公司抄唔到錶，所以唔少舊樓嘅每期煤氣費，都係靠估，張單上有寫明「估計讀數」，有機會會估多咗十度八度不等。不過如果之後抄錶服務恢復正常，到時煤氣公司知道估多咗，會喺下一張單減番。而家報錶方法都幾簡單，建議客戶收到煤氣費時睇一睇，再對吓個煤氣錶（通常喺廚房灶頭下面）。

Q3：客戶點樣自己報錶？
A：客戶可透過以下4種方法報錶，大約兩個月報一次就得：
1）24小時報錶熱線2880 5522；
2）登入網上客戶中心，輸入客戶號碼同煤氣錶度數；
3）上網登記報錶提示服務，煤氣公司會透過電話提醒客戶報錶；
4）經煤氣公司手機應用程式報錶。

{{hket:inline-image name="0325WLfeaturepage877.jpg"}}{{/hket:inline-image}}

Q4：煤氣煮食爐都會用好多煤氣？
A：唔少人都會問，點解我好少用煤氣爐煮飯，但煤氣費都咁貴？其實，煤氣熱水爐先係用煤氣嘅「元兇」，煤氣煮食爐完全無得比。假設用煤氣煮食爐來煲水，一煲室溫水用大火煲到去37度，大約1至2分鐘左右。但係用煤氣熱水爐沖涼，就每一秒都有37度熱水沖出嚟，沖一次涼閒閒地十幾至半個鐘，可想而知熱水爐要長時間維持熱水熱度用嘅煤氣，係煮食爐好多好多好多倍。除非每日由朝煮嘢煮到黑，開足十幾個鐘大火，否則正常咁煮食，煤氣費上落都唔會太大，呢樣亦間接解釋咗點解冬天煤氣費特別貴，因為根本唔關煮飯事（乜天氣都係煮兩餐）。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/