【聲明】港生活網站並無進行電話推廣活動

復活節去淺水灣The Pulse 小孩毛孩齊樂透

發佈時間: 2021/03/26

今個復活節,毛孩大把去好處!黛安知道,淺水灣The Pulse商場下月2日起,將一連5日舉行「繽蹦跳跳復活節彩蛋定向」,最啱一家大細去享天倫樂。事關小朋友憑闖關遊戲就有機會贏取豐富禮物,毛孩主人幫愛寵打卡,亦可換領限量寵物禮品。

復活節期間商場亦會推出消費優惠,買滿1,000元即有機會獲得100元餐飲禮券、50元禮券或神秘禮物。至於商場1、2樓亦設置咗10個復活蛋捕獲點,憑即日消費就可換領任務卡,畀小朋友動腦筋將謎題逐個破解,成功挑戰小遊戲,集齊印章就可以贏大獎。

期內商場另會舉行「毛孩復活節萌照召集」活動,唔同角落都擺滿可愛造型氣球,主子只要幫毛孩影張靚相,上載到ig兼tag埋#the pulse,就可換領限量寵物禮品。

另外,位於沙田市中心嘅HomeSquare,即日起至4月11日,逢星期六、日及公眾假期亦會舉行《寵物‧家‧市集》,場內超過20個檔位會出售本地自家製手作,包括寵物得意衣物、天然健康食品,以至疫情必備嘅寵物清潔用品等。

商場仲好細心,同隔離沙田新城市廣場合作,提供免費租借寵物車服務,掃完貨行過去寵物公園放電,玩足全日都得啦。

撰文: 黛安 消息特靈八卦公關
欄名: 八卦名利場