李佳芯唔願再講陳炳銓

李佳芯（Ali）與田蕊妮（阿田）同屬視后，二人前晚出席藝術紀錄片《Bad Acting》首映，均說想在演技上再進步。最近盛傳與陳炳銓分手的Ali，講起演戲滔滔不絕，但一提陳炳銓即時冷淡，坦言不想再談感情事。

由舞台劇導演及戲劇導師甄詠蓓與導演蔡美詩製作的藝術紀錄片《Bad Acting》前晚舉行慈善首映，紀錄片呈現藝人們上演藝課堂的真實片段，李佳芯在片中挑戰獨腳戲，飾演被追數的債仔︰「我演出嗰陣好似精神病咁，對住空氣演戲。喺無對手嘅清況仲難演，不過我成日都對住塊鏡自言自語勉勵自己，畀自己一啲承諾。」有傳她與拍拖六年的陳炳銓分手，她提到感情狀況時即落閘︰「唔再講啦，感情一直都低調處理，要時間。」

至於忙於採排舞台劇的阿田認為學海無涯，她自言由離巢TVB時已有進修計劃︰「我想去法國學戲，好多人話唔識法文會好弊，我諗住用身體語言，希望『喱騷』（自資網台）穩定啲，通關後可以出發。」提到老公杜汶澤正於台灣工作，五個月無見老公的阿田笑說︰「大家唔使擔心我孤零零，每日都可以FaceTime見面。」

蔡思貝林德信扮收數佬

同場的蔡思貝與林德信，因跟隨甄詠蓓學戲而在紀錄片中現身。二人演繹惡形惡相的收數佬，思貝說︰「我係放肆演出，特登呈現番啲錯處。另外，我好欣賞蝦頭（楊詩敏），佢永遠上堂增值，佢話演員要溫故知新，我要向佢學習。」向來文質彬彬的林德信則說︰「我要扮惡嘅收數佬，有時愈斯文先愈恐怖。」

採訪︰Pauline

攝影︰林良明

美術︰招潤洪