田啟文5月開戲圓智叔導演夢

廖啟智生前籌備自導自演的電影《翻兜人生》，該片監製田啟文（田雞）受訪稱︰「智叔喺剛過去嘅周末仲叫學生搵我傾齣戲，我應承無論咩情況都會搞掂！」田雞強調智叔必定是該片導演，將保留其導演職銜，「我或其他人頂佢只係執行導演，盡量喺五月開拍，完成佢遺願！」

此外，田雞去年已得悉智叔患胃癌第四期：「佢一路都好積極，話完成咗兩次化療，會出番嚟再搞齣戲。上星期智叔話自己心臟都停頓咗兩次，佢話走咗兩次都走唔到，叫我唔駛擔心，最多嚟唔到開鏡，佢相信可以戰勝癌魔！」