【聲明】港生活網站並無進行電話推廣活動

《解構心機女》遭江嘉敏寸爆常遲到 馮盈盈︰成年無約出街唔記得喇

發佈時間: 2021/03/31

無綫節目《解構心機女》前晚於J2台首播,找來反面大半年的馮盈盈及江嘉敏(Kaman)當主持。節目錄影時已是非多多,首集Kaman爆seed狠批盈盈曾是遲到王,火藥味濃。昨午盈盈回覆《晴報》時,澄清上次相約對方已是一年前,她已忘記詳情,更大方說︰「如果真係有遲,講番聲唔好意思!」

近期無綫實行綜藝節目大改革,全新製作的《解構心機女》於前晚播出,主持盈盈及Kaman這對過氣閨密,去年六月因「富豪船P」勢成水火,自此有你無我,經常在社交網隔空互窒。不過,無綫為製造話題谷收視,刻意安排二人在節目中「合體」,錄影時更因一張合照激起「P圖羅生門」事件,兩位「惹火尤物」輕易擦出火花。

盈盈稱主人家應份遲到

第一集初時安排劉佩玥坐在盈盈及Kaman中間,眾人話題談到女生刻意遲到是有機心的行為,盈盈即時專家上身,指世界上有一種叫「fashionably late」(技術性遲到)︰「有種隆重登場嘅感覺!如果約好開會,係會刻意遲五至十分鐘,因為(對方)要準備唔同文件;如果準時到望住佢哋準備,好似畀壓力催佢哋咁!所以fashionably late,主人家遲少少先出場。」Kaman聞言即把握機會寸爆死敵︰「知唔知點解呢個話題馮盈盈可以講得咁順暢、咁熱烈同開心?佢次次約親我哋去行街、食飯,做乜嘢都好,佢每次都係fashionably late,無一次唔係!」

戴祖儀出手打圓場

馮盈盈未及反駁,主持之一的戴祖儀見火藥味急升即打圓場,刻意將話題轉向男嘉賓張振朗,振朗亦幫手降溫︰「不如問下我,我都想講。」昨午問到盈盈過往與Kaman外出是否「例遲」,她推說已忘得一乾二淨︰「其實因為工作太忙,我同佢對上一次約出街見面,都已經差不多一年前喇,咁耐之前嘅事,我都已經唔記得詳情喇,如果我同佢之前見面真係有遲到的話,我講番聲唔好意思,希望佢唔好再繼續放喺心上啦!」被爆舊事似刻意製造節目效果?她坦言︰「好多謝大家咁留意我哋節目,第一集出街就已經咁多報道喇,好好宣傳效果!」看來兩大心機女在往後節目將會密密過招。

撰文︰Steven

美術︰梁政敏

《解構心機女》遭江嘉敏寸爆常遲到 馮盈盈︰成年無約出街唔記得喇

Kaman(右)爆盈盈「老是常遲到」時表現激動,劉佩玥(中)亦表現贊同。(網上截圖)

《解構心機女》遭江嘉敏寸爆常遲到 馮盈盈︰成年無約出街唔記得喇

盈盈在節目中如同約會達人,教觀眾在適當時候遲到。(網上截圖)

《解構心機女》遭江嘉敏寸爆常遲到 馮盈盈︰成年無約出街唔記得喇

《解構心機女》眾女星分享俘虜男性的招數,有望吸引後生女觀眾。(網上截圖)