唔怕「燈死」姜濤 譚詠麟笑笑口︰死而不姜

樂壇校長譚詠麟（阿倫）日前大讚姜濤回應惡搞「姜蓉」事件有器量有風度，但不少網民擔心有「燈神」之稱的阿倫會「燈死」姜濤。昨日阿倫現身公開活動時，自信稱姜濤被自已「燈死」，他笑言︰「死唔去嘅，死而不『姜』。」

譚詠麟昨日為港台新節目造勢，阿倫本月初已接種科興疫苗，問他事後可有任何身體反應？他說︰「我同朋友一齊打，佢哋兩星期後感到眼瞓，我就有一日半日眼瞓，我好少可，不過只係眼瞓就無乜好擔心。」近日阿倫亦有留意姜濤被惡搞的新聞，阿倫事後在微博大讚對方有器量，惟他讚完後，網上出現不同聲音，但前年已關掉FB戶口的阿倫，坦言無留意網民反應︰「係唔想睇，唔係咁多人同你有一樣意見同想法。」

揚言曾貼中G.E.M.爆紅

對於網民擔心其「燈神」功力太勁，會「燈死」姜濤？阿倫沒好氣說︰「唔好傻啦，你睇李克勤做得幾好，我以前都講過好多個，我係最早喺內地講G.E.M.（鄧紫棋）同陳奕迅，佢哋終於出咗嚟啦，呢啲又唔見你哋講？（怕不怕燈死姜濤？）咁容易燈死咩，如果係咁我燈死咗好多人啦，死唔去嘅，死而不『姜』。」

提到曾志偉掌管無綫綜藝及音樂節目，阿倫透露已提醒志偉多做音樂節目︰「做好香港音樂，唔好分『你台我台』，最緊要大家齊心。（帶MIRROR上《聲夢》？）我唔識佢哋，大家交流下，我有留意姜濤，由佢開始訓練時已經有睇，覺得呢個男仔幾得意，又肥肥哋幾過癮，依家愈嚟愈好。」阿倫再次大讚姜濤回答傳媒時大方得體︰「好少見後生仔咁識諗，EQ拍得住我。（點睇無綫惡搞姜濤？）我覺得佢（姜濤）一定唔會擺喺心，fans擺喺心就一定，唔好諗埋一邊咪得囉！」至於近日「新疆棉」風波，阿倫只說：「問番政治人物，問我做乜鬼。（有內地網民燒波鞋？）啲鞋捐畀人啦，燒鞋好大嘥。」

採訪︰倪小珊

攝影︰林良明

美術︰梁政敏