無懼「燈神」譚詠麟加持 姜濤︰我唔係太信邪嘢

人氣爆燈的姜濤日前獲校長譚詠麟（阿倫）大讚回應「姜蓉」事件時有器量，昨日姜濤連聲多謝阿倫，但問到會否擔心經「燈神」阿倫加持後人氣跌時，姜濤一臉茫然，又揚言不會信邪。

姜濤昨日到九龍灣出席「人生照相館」開幕禮，台上司儀問姜濤最想返回哪個時刻拍照？姜濤表示想重返今年1月1日的叱咤頒獎禮︰「當時我個O嘴表情令我好後悔，希望重新影一張靚啲嘅相。」對於阿倫日前點名稱讚他，姜濤表示︰「多謝，好開心，睇到佢有留意我哋呢班新人，希望大家可以繼續留意我哋。」提到有網民擔心姜濤會被阿倫的「燈神」威力「燈死」，姜濤起初不明白「燈」的意思，經了解後才說︰「唔會，有人稱讚就開心啦，自己唔係太信啲邪嘢。」

對於阿倫提議他與MIRROR上無綫《聲夢傳奇》，姜濤說︰「都好開心，我哋任何表演節目都想參加，有得表演已經好好。」跟阿倫合作？姜濤直言︰「如果有機會當然樂意，個個都想，無話要求想同邊個前輩合作。我父母都有聽佢（校長）嘅歌，我都有聽過。」提到馮盈盈想跟姜濤合作真人騷，姜濤說︰「希望邀請全隊MIRROR啦，我一個人唔識講嘢。（覺得盈盈抽水？）唔會，我哋又唔係特別犀利，唔好成日話人抽我哋水，大家交流啫。」

留待紅館開騷才騷肌

姜濤近日為演唱會積極操fit，昨日見他消瘦不少，但他笑稱是化粧師幫他狂打陰影的功勞。他坦言仍未達到經理人花姐（黃慧君）減十多磅的要求，但因開騷要有足夠體力，所以不會禁食減肥，改為跟隊友齊齊做gym。是否打算騷肌？他說︰「留番去紅館開騷先，依家我學緊樂器，到時會表演。」提到演唱會加開至六場，姜濤慶幸朋友少不用孭「飛債」，而去年中風的姜爸康復進度理想，更表示想去睇騷。他說︰「爸爸出院時好瘦，依家肥咗，活動能力亦OK，放心晒。」

採訪︰倪小珊

美術︰梁政敏