63歲魯振順自爆婚訊嚮往黃昏戀 女友幫「爭口氣」：成日話我Gay

現年63歲嘅「綠葉王」魯振順，入行40多年演繹過無數角色，惟獨關於他的感情則鮮有提及，身邊亦不見有女伴，令不少人懷疑他的性取向。其實魯振順曾經講過在29歲時曾向拍拖7年的女友求婚被拒，分手後前度更自爆曾為佢墮胎，當時對他打擊極深；加上事業不順，結果他試過割脈自殺。魯振順其後對愛情抱隨緣心態，但依然期待遇到一拍即合嘅人。

{{hket:inline-image name="7cf25f58-f24d-42cb-a393-7f9d65dc17ce.JPG"}}{{/hket:inline-image}}

日前魯振順接受范振鋒和林子博主持的新城節目《BiLiBALA開大喇叭》訪問，在節目上自爆婚訊，未婚妻係41年前於歌唱比賽認識嘅女同學，計劃疫情結束後結婚。魯振順表示獲高人改名為「釋禧」後，重遇女同學：「佢比我後生6年，嗰陣我哋有一齊上堂，不過因為我要兼顧訓練班，邊有時間參加同學聚會，變咗唔算有太多交流。好奇怪，喺舊年佢睇完我啲訪問後，了解咗魯振順，原來我係咁慘，又覺得我好真，居然搵番我。」

言談間魯振順表示自己相信緣份，覺得係媽媽安排女友嚟照顧自己，續道：「我阿媽喺2017年走咗，嗰陣經歷過一啲事，有叫過阿媽帶埋我走，不過佢叫我要好好活下去，唔好亂諗嘢，點知冇耐女友就出現，連佢都話可能係阿媽派佢嚟陪我，好直覺想見我。我第一次食佢包嘅餃子，一食就喊，因為同我阿媽包嘅味道一模一樣，感覺好Warm，所以就更加珍惜。」

（↓點擊放大睇圖片↓）

魯振順透露一直都想組織家庭：「我一直都好渴望有一個家庭，冇遇人不淑，只係遇唔到。我之前見到陳榮峻同吳香倫結婚，我都好嚮往，唔知幾時先到我，可能呢幾年我釋懷咗好多嘢，所以上天安排我遇到呢個黃昏戀。」問到婚禮詳情，魯振順計劃大排筵席：「到時我哋會唱歌，部份人情可能會拎嚟做善事， 所有嘢等女友負責，佢成日話要幫我爭番口氣，唔好成日都話我係Gay！」

魯振順好友陳榮峻接受傳媒訪問時表示一入TVB已認識魯振順，相交近40載，一早知佢唔係同性戀；不過就連佢話拍拖都冇聽過，覺得好突然咁話：「唔知（佢結婚），哈哈，真係冇聽過，但恭喜佢先！」