Mirror成員Jer︱柳應廷玩街頭音樂體會搵食艱難 《全民造星》找回初心拒再當齒輪

人氣組合Mirror出道三年，即將迎來入行以來第二個演唱會。成員之一的柳應廷（Jer）上年推出三首「物語系列」的歌曲後大獲好評，更於今年年初的《叱咤樂壇頒獎典禮》獲生力軍男歌手金獎。Jer最近再下一城，推出新歌《狂人日記》。Jer嶄新的曲風及唱腔除了為聽眾帶來聽覺上的衝擊外，他亦希望把Progressive Rock帶入廣東歌，「好開心開創到呢種廣東歌嘅先河。」

{{hket:youtube id="JqPkIjEkYKU"}}{{/hket:youtube}}

Jer直言想用《狂人日記》一曲為香港樂壇帶來新的衝擊，「其實我做呢首歌嘅時侯冇諗自己唱唔唱到，只係想為香港帶嚟一個唔常見嘅廣東歌音樂風格。做嘅時候冇諗過首歌音域會咁闊，當時只係諗到呢首歌嘅重點就係好黐線，每一part都捉摸唔到，嗰個係狂人情緒，每一part都好豐富。」直言當初怕大家未必能接受這種廣東歌風格，不過新歌出街後反應亦不錯，令他放下心頭大石。

{{hket:inline-image name="3.jpeg"}}{{/hket:inline-image}}

Mirror團隊經理人花姐亦全力支持他的創作，Jer表示她有參與聽demo、揀歌的過程，「當時佢都擔心呢首歌唔夠商業化，而我一直說服花姐，話我可以將呢個潮流帶嚟香港。佢一開始唔係好信，不停問身邊朋友覺得呢首歌點，啲朋友回應都偏正面，所以佢都慢慢接受，放手畀我去做自己鍾意做嘅音樂。」

{{hket:inline-image name="160297756_761041158117726_3015321650072723988_n.jpg"}}{{/hket:inline-image}}

在5月的演唱會中，Jer會演唱這首歌，稱這首歌可以帶動演唱會氣氛，「一定要喺一個音響好好嘅情況下先會唱呢首歌，我想大家聽完係feel到首歌係好瘋狂，所以要喺演唱會呢個氛圍下，而且音響好勁嘅時候聽，先會令人體會到呢首歌嘅精神。」同時希望透過演唱會讓觀眾知道Mirror整個團體已經有所成長、進步。

（↓點擊圖片放大↓）

自小喜歡音樂的Jer，大專畢業後曾全職投身音樂、樂團工作，除了與朋友夾Band外，更於香港各區街頭表演。不過後來因生計一度轉職記者。「我以前做記者係因為我做音樂好難搵食，而被迫做一份有收入嘅工，有貢獻畀屋企人。做咗兩年幾、三年，就覺得好似有一個樽頸位，每日都好似齒輪咁不斷地運轉，每日做嘅事又差唔多。」

{{hket:inline-image name="4.jpeg"}}{{/hket:inline-image}}

Jer反覆思索，認為自己的初心仍然是音樂及唱歌，在2018年，剛好那時ViuTV製作節目《全民造星》，他便辭職，放手一博參加。「雖然第一round輸咗，但之後可以復活，仲加入埋Ｍirror，條路一開始係有挫折，但之後都好順暢。」

出道差不多三年，Jer指現在做歌手每日都過得好充實，「以前未必做緊自己好鍾意嘅嘢，時間就好似過得好慢。雖然初時加入Mirror時只想專注音樂，但自從開始接觸戲劇之後，覺得都係另一個渠道去抒發自己嘅感情。而家每日都學緊唔同嘅嘢，學做戲，好似我今次MV做一個狂人角色咁。每日都好好玩，好大挑戰性。」

（↓點擊圖片放大↓）

與其餘Mirror 11子比較，Jer表示與眾人最大分別是在曲風上。「姜濤、Edan（呂爵安）曲風偏向愛情路線，而我玩嘅嘢可以好闊，由狂到喪，有好多嘢玩到。但有好多嘢我都未試過，例如Jazz、Funk。唱落我同佢地定位都好唔同，但我覺得唔使特登去界定要同佢哋一樣或唔同。」

Jer在今年年初獲「叱咤樂壇新力軍金獎」，表示獎項對他而言是一種鼓勵，在未來希望他的歌曲可以影響更多人，陪伴不同人成長及經歷苦與樂。「其實香港有好多有心人，喺背後繼續做好佢哋嘅作品，今年Mirror咁多人注目，希望多同一啲有potential嘅朋友合作，令大家透過Mirror睇到呢班幕後功臣。呢個都係我未來嘅目標。」

{{hket:inline-image name="2.png"}}{{/hket:inline-image}}

{{hket:inline-image name="6.jpeg"}}{{/hket:inline-image}}

化妝：Ali wong @AnnieG. Chan Makeup Centre
髮型：Denny ku@Chic Private I salon
服裝： Bally
攝影：潘卓忻
製作：黃紫維
撰文：林惠珊