「私追」事件繼續發酵 姜濤公開道歉平息風波

男團MIRROR昨日出席ViuTV五周年台慶，日前他們到梅窩拍攝梁祖堯主持的新節目《調教你MIRROR》時發生「私追」風波，有傳被鬧喊的粉絲聲言要脫粉，姜濤直言不開心，為了平息事件，姜濤代表眾人安撫粉絲︰「我想同大家講Sorry！」

昨日ViuTV旗下藝人、歌手傾巢而出，MIRROR壓軸出場載歌載舞，更獲同場的名導杜琪峯點名稱讚︰「最尾壓軸嗰隊叫Miller（MIRROR）？佢哋真係唔同，比我想像中唔同。」杜琪峯又透露與ViuTV董事兼總經理魯庭暉洽談合作。

提到「私追」事件，MIRROR隊長楊樂文（Lokman）強調事件絕非電視台為營造節目效果而預設︰「嗰日仲有其他環節喺戶外做，但粉絲太熱情，無處不在，真係影響拍攝。」呂爵安（Edan）透露全隊考慮後，一致決定跟現場粉絲「訓話」，有粉絲被訓話到喊兼要「脫粉」？Lokman說︰「唔驚，可能佢哋睇完節目更加愛我哋，有少少嬲爆爆心情睇，睇完之後就暖笠笠呢！」

被拍門騷擾想搬屋

姜濤亦主動開腔說︰「我哋任何一個都唔會攞粉絲嚟開玩笑，點會為咗節目效果出賣自己粉絲，呢樣絕對無可能發生。（粉絲話捧得起你亦踩得你低？）老實講一定有唔開心，可能真係引起大家唔好嘅觀感，我都想同大家講sorry，可能自己說話重咗啲，如果再畀多次機會我，可能處理得好啲。（有粉絲敲你門？係咪想搬屋？）都想嘅，要加人工先得！」

至於被指拿着GoPro追住粉絲拍攝的梁祖堯，昨日揚言已預料有此結果︰「之後節目出街就會知道。（話你好惡？）我邊有惡？我揸住部機係做緊live畀花姐睇，我用自己電話播住畀花姐睇。（唔係攞GoPro？）我哋每人都有支GoPro，如果你哋話影粉絲，我都唔知佢哋唔想上鏡，個鏡頭一路圍住大家，如果佢哋唔想上鏡咪行開啲，佢哋又貼面咁隊住MIRROR影，如果真係介意人哋咁影你，你都唔應該咁影其他人。」

採訪︰倪小珊

美術︰梁政敏