南越Fushion菜令人耳目一新

上星期五《開心日報》嘅「今晚食啲乜」環節，食評人龍少爺介紹屬於南越Fushion菜嘅主題餐廳cafe，佢影嘅食物照片賣相特別又有創意。原來廚師以嶄新概念融入來自世界各地嘅烹調靈感，令越南菜式耳目一新，邊睇邊勾起我嘅食慾同好奇心，好想感受下究竟創新嘅越南菜係點嘅呢？

做完節目後，即問龍少爺攞地址，約朋友親身去體驗下。

南越南咖啡廳位於旺角彌敦道726號，呢幢大廈內有唔同嘅餐廳。電梯門打開，視覺嘅創意體驗都幾突出，喺寸金尺土嘅環境中，令人有無拘束嘅感覺，室內設計與各種細節中都加有創意與街頭設計，更帶有餐廳、酒吧及cafe嘅元素。

至於食物配搭則別具創意，睇到廚師好有心思。原來主理人係Justin Chan陳希裕，他被譽為「越南粉教父」，曾創下日賣400碗越南粉的長龍紀錄。必試嫲嫲南越湯招牌金邊粉，湯頭以牛骨、牛筋、牛尾及牛腱熬煮12小時至極濃，不加魚露及香料，講求原汁原味，口感香醇、濃而不搶味，鮮甜順滑。再配上新鮮金邊粉及牛肉片、牛面珠、牛筋、牛腱、牛肉丸、油條等材料，食落香氣撲鼻，粉滑滋味，配以拉差辣椒醬及海鮮醬蘸點牛肉，甜與辣嘅配搭令層次感大大提升。一碗咁豐富材料心機招牌粉，賣$88我覺得好值。

佢哋仲有其他菜式，價錢都收得幾有良心。南越蟹肉醬配脆球餅（$68），可自行調整分量，將特製蟹肉醬放脆球餅中，香脆口感配酸酸甜甜的蟹肉醬，非常開胃！五香豬腩伴鍋巴（$48），特製醬汁配入味嘅五香豬腩，再配埋脆卜卜嘅鍋巴帶來多重口感，嚿邪惡豬腩鬼咁美味，配埋好多花款飲品，如越式蛋咖啡，面層浮住微暖香脆嘅焦糖蛋醬，配上冰涼香滑咖啡，帶來微妙嘅雙重口感。

因字數有限，好奇嘅話請自己去試下啦。因為我唔係食評人，所以寫食評質素係咁上下，請見諒。（本欄逢周四刊登）