衛詩雅擔心《不日成婚》票房變瘦

衛詩雅昨日出席代言的美容院活動，自稱小時候是「毛孩」及「美人生鬚」的她，獲得贊助脫毛，她開心表示︰「好明白好多女仔有呢啲煩惱，我全身脫晒毛，好滑㗎，滑到條裙都跣。」

衛詩雅透露自己主演的新戲《不日成婚》上映，因擔心票房而壓力大增，竟令身形消瘦不少，她說︰「每日起身就好似睇股市咁，成日望住票房入座率，因為我依家周圍去謝票，但時間、地點唔定，例如今日睇到尖沙咀場次爆滿，就成班衝去謝票，成日都stand by，又瞓得唔好。」幸好新戲票房及口碑不俗，令她放下心頭大石。

忙電影宣傳後，衛詩雅透露將會原班人馬籌備開拍續集，提到她日前帶同有份參演的五歲姪女衛瑆妍現身首映，但小姪女不經意踢爆曾見過陳家樂女友連詩雅，場面尷尬。問續集可會再安排姪女演出？衛詩雅笑言不敢再安排姪女接受訪問︰「佢好開心呀，睇到自己版面咁多，話好多記者訪問佢，喺屋企講足成晚，我話你唔入行嘥晒，搶晒鏡。不過，我反而想預佢細佬（姪仔）多啲，佢細佬好靚仔。」會否想姪女入行？她即落閘︰「唔想，因為見過五光十色世界後，會無晒童真，好老積。」

採訪︰倪小珊

攝影：林良明

美術︰梁政敏