見證馬德鐘由9綫藝員變視帝 歐陽震華︰感恩我仲未退休

歐陽震華（Bobby）與馬德鐘昨日出席新劇《伙記辦大事》宣傳，原來兩位視帝對上一次合作已是97年劇集《醉打金枝》，Bobby笑言見證馬神榮升視帝，令他十分開心，他們更坦言只在意新劇口碑，收視反而不是最重要。

新劇《伙記辦大事》一眾演員昨日齊集宣傳，女主角萬綺雯因在內地工作缺席，而官非纏身的楊明也沒有現身。兩位男主角歐陽震華及馬德鐘已20多年沒合作，馬神笑說︰「我哋合作拍《醉打金枝》嗰陣，我仲係七、八、九綫藝員，有得同Bobby合作好開心，今次直情鬥戲，真係心心眼！」Bobby亦笑說︰「我最感恩係仲未退休，睇住佢（馬神）依家攞視帝，大家再合作好開心。之前胡定欣又係，我由佢細路女等到依家可以演一對。」

Bobby向來有收視福將之稱，但他坦言收視很虛無，口碑才最緊要，馬神亦大表贊同。提到有官司在身的楊明有份演出，會否擔心被網民抨擊？Bobby說事件已進入法律程序，不便多談。Bobby又取笑女主角萬綺雯︰「佢喺內地落地生根，所以我提議幫佢整『紙板』，佢依家密謀喺浙江開民宿，將來拍完戲可以去度假！」

楊明戲份無被刪

另外，有觀眾發現《伙記辦大事》的宣傳海報飛走楊明，《伙》劇監製陳耀全解釋︰「因為佢嘅案件進入司法程序，現階段唔應該用佢宣傳，對佢同對劇組都比較好，所以海報同宣傳都盡量避開，但楊明嘅戲份無刪剪，照原本播放。」提到楊明飾演交通警，但現實中牽涉交通意外官司，陳耀全不擔心若外界批評劇集︰「始終只係演戲，相信觀眾分得開現實同戲劇分別。」

採訪︰Pauline

美術︰梁政敏