無綫直播節目《開心大綜藝》與ViuTv《最後一屆口罩小姐選舉總決賽》昨晚正面交鋒，《開》首播即以「扮嘢王」王祖藍化身特首藍太搶Fo；陸永、阮兆祥分別變身圓教授及張醫生，盡見歡樂氣氛。無綫副總經理曾志偉昨午受訪時強調節目難與ViuTV比較︰「翡翠台嘅節目係合家歡，ViuTV題材偏少少！」
全新無綫合家歡直播節目《開心大綜藝》昨晚首播，節目有大型歌舞、短劇及遊戲環節，如同《歡樂今宵》2.0一樣。不過，最爆笑要數短劇環節抽盡疫情記者會，陸永戴鴨嘴口罩及祥仔戴假髮，分別變A貨袁國勇及張竹君。TVB首席創意官王祖藍竟變身「無綫特別堆田區行政長官」藍太，擺明惡搞特首林鄭月娥，更播姜濤靚仔相。至於壓軸演出「我要上台慶」的朱晨麗（朱朱）、劉佩玥及鄧佩儀，三人事前稱唔舒服，但最終表現尚算不俗。無綫又安排200名觀眾入場，感受現場節目氣氛。提到扮特首，昨晚祖藍受訪時稱︰「我一路有留意佢（特首）啲小動作、冷笑及甩鞋，都做到足！」他又強調打頭炮才粉墨登場，不過笑言有需要亦會再做。
志偉預告谷J2迎敵
對於收視壓力及硬撼《口罩小姐》，志偉昨午出席拜神時直言沒壓力︰「無諗贏輸，最緊要有口碑，有綜藝節目畀一家人食完飯睇，恢復觀眾對無綫節目嘅信心。」他重申翡翠台比較合家歡，並稱︰「選港姐就選港姐，戴住個口罩又點選呢？ViuTV最高得4點收視，我哋30點，ViuTV節目題材偏少少，只係可以同J2比，嚟緊會發展J2同ViuTV比拼。」
志偉自爆返回TVB首日已致電ViuTV高層魯庭暉冀邀請姜濤參與無綫節目，最終慘食檸檬︰「當時對方話『梗係唔得啦，遲啲再傾啦』，我就好開放的，好似郭偉亮、羅敏莊之前也去過ViuTV都唔駛過冷河。」日前電視廣播（TVB）大股東黎瑞剛轟無綫「老化」，志偉強調現時他們盡力在三數年內培養年輕接班人。
採訪︰Pauline
撰文︰Steven
美術︰鄧建威