【聲明】港生活網站並無進行電話推廣活動

安東尼鶴健士超班 演活失智老人

發佈時間: 2021/04/15

有套電影一直想睇卻唔敢睇:《爸爸可否不要老》(The Father)。故事太真實,加上絕頂出色嘅演員安東尼鶴健士,扮演患上失智症嘅年邁老父,精采演繹老人失去認知時間與人物嘅迷惘錯亂,教人深深感受到年老所帶來嘅痛苦。

其實幾年前我媽咪從醫院回家後,都有記性同情緒退化嘅問題,令我好困擾,所以絕對能體會電影中女兒嗰份無助感。

當時我自以為好辛苦吃力之際,原來身邊有好些朋友,佢哋嘅愛同耐性先係超凡。其中有位女朋友每日返工前要去街市買餸,之後返工。放工後要趕返屋企,雖然佢有兩個工人輪班照顧佢失智嘅母親,但貼身事情,例如沖涼等,都係由佢親自跟進。佢要兼顧打理家頭細務,因為佢母親嘅失智已非常嚴重,需要貼身睇住,如果睇漏眼,老人家就會做出好多嚴重嘅反應。我見到呢位朋友真係心身疲累。相對來說,我真係小巫見大巫。最痛心嘅係,朋友嘅母親已經唔太認得佢。

當我睇到這一切,我即刻覺得我90歲嘅媽咪真係好叻女,雖然記性退化,重複又重複,真係好考驗我嘅耐性,再加上有時會有被害嘅妄想,令我好困擾,加上我EQ好低,情緒會爆炸,但發脾氣後又會好內疚。

所以,呢套咁寫實嘅電影,我真係帶住戰戰兢兢嘅心情去睇。因為你確實能感受到嗰份無奈兼同病相憐嘅感受。加上安東尼鶴健士飾演罹患失智症嘅父親,透過爐火純青嘅演技,展現出老年人罹患失智症後,其憤怒、多疑、慌張、悔恨、悲傷、思念等多種情緒的瞬間轉變。我亦可以對我媽咪嘅感受有多啲理解,這套電影絕對令我感受良多。

安東尼鶴健士成為第74屆「英國影藝學院電影獎」(BAFTA)最佳男主角實在當之無愧。期望嚟緊嘅奧斯卡金像獎,佢可以問鼎最佳男主角獎!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭