換季好去處 東薈城名店倉1折狂歡 朗豪坊快閃半價

換季shopping又有好去處！黛安收到風，東薈城名店倉即日起舉辦「狂歡購物祭」，推廣為期1個月，有過千件商品以低至1折發售，仲可以享有最多$600現金券回贈㖭！

今次限時優惠焦點產品，包括法國Chloé嘅迷你Chloe C手袋，原價$13,400，現以59折發售，唔使$8,000就可以買到；Coach時尚腰包更由$4,950減到$990；意大利品牌Ermenegildo Zegna指定服裝及運動鞋則全部1折起發售。另外，商場會員消費滿$2,000以上，即可換領指定商戶$100現金券，買滿$5,000更可享$500現金券。

另外，旺角朗豪坊即日起至下月6日，逢星期四亦會舉行ThursGiving活動，推出限定半價或買一送一快閃優惠，同場BEAUTY AVENUE即日起至下月2日，仲會舉行BEAUTY GALA，超過200款美粧新品、套裝低至4折發售，超抵買啊。