柳應廷音樂狂人日記

出道快將三年的MIRROR，即將迎來入行以來第二個演唱會。成員之一的柳應廷（Jer）出名唱得，三首「物語系列」單飛作品令他勇奪叱咤生力軍男歌手金獎，前晚又在《Chill Club》頒獎禮再奪「年度新人」。最近推出新歌《狂人日記》的Jer，現實中亦是位音樂狂人，以新曲風及唱腔衝擊樂迷聽覺，望開創廣東歌progressive rock（前衛搖滾）的先河。

平日看來傻更更的柳應廷，以歇斯底里的情緒、瘋狂癲喪的唱腔演繹新歌《狂人日記》，令樂迷耳目一新。Jer野心不小，希望歌曲為香港樂壇帶來新的衝擊，「其實我做呢首歌嘅時候，無諗過自己唱唔唱到，只係想為香港帶嚟一種唔常見嘅廣東歌音樂風格。但無諗過首歌音域咁闊，當時只諗到首歌嘅重點就係要好黐綫，每一part都捉摸唔到同好豐富，就係嗰種狂人情緒。」

說服花姐放手

MIRROR經理人花姐（黃慧君）全力支持Jer的音樂創作，更一同參與聽demo、揀歌的過程，「當時花姐都擔心過《狂人日記》唔夠商業化，而我一直說服花姐，話我可以將呢個潮流帶嚟香港。佢一開始唔係好信，不停問身邊朋友覺得隻歌點，好彩朋友回應都偏向正面，佢先慢慢接受，放手畀我去做自己鍾意嘅音樂。」樂迷對新歌反應不俗，證明Jer的堅持有回報。

下月MIRROR舉行演唱會，Jer期望《狂人日記》可帶動演唱會氣氛，「一定要喺一個音響好好嘅情況下先會唱呢首歌，我想大家聽完會feel到首歌係好瘋狂，所以要喺演唱會呢個氛圍下，先令人體會到呢首歌嘅精神。」與MIRROR兄弟比較，Jer與眾人最大分別就是曲風。「姜濤、Edan（呂爵安）曲風偏向愛情路綫，而我玩嘅嘢（曲風）可以好闊，由狂到喪，亦有好多嘢我未試過，例如jazz、funk。我哋定位好唔同，但我覺得唔使特登去界定要同佢哋一樣或唔同。」

說到音樂歷程，自小喜歡音樂的Jer，大專畢業後一度全職投身音樂，除了與朋友夾band外，又在街頭busking，後來為生計一度轉行做娛樂記者。「我以前做記者係因為做音樂真係好難搵食，被迫做一份有收入嘅工，有貢獻畀屋企人。做咗兩年幾，覺得好似到咗樽頸位，每日好似齒輪咁不斷運轉，每日做嘅事又差唔多。」反覆思索，他確認初心仍是音樂及唱歌，當時ViuTV正好製作節目《全民造星》，他便索性辭職參加。「雖然第一round輸咗，但之後可以復活，仲加入埋MIRROR，條路一開始係有挫折，但之後都好順暢。」

從街頭表演到《造星》

Jer今年初獲「叱咤樂壇新力軍金獎」後，前晚在《Chill Club》頒獎禮再贏「年度新人」，他表示獎項是一種鼓勵，希望將來以歌曲影響更多人，陪伴大家成長及經歷苦與樂。「其實香港有好多有心人，喺背後繼續做好佢哋嘅作品，今年MIRROR咁多人注目，希望多啲同有potential嘅朋友合作，令大家透過MIRROR睇到呢班幕後功臣，就係我未來嘅目標。」

【一按睇片】

化粧︰Ali Wong @AnnieG. Chan Makeup Centre

髮型︰Denny Ku@Chic Private i salon

服裝︰Bally

撰文︰林惠珊

攝影︰潘卓忻、黃紫維

美術︰梁政敏