安息禮丨廖啟智無懼死亡惟不捨愛妻獨撐 「敏兒，我係諗住殿後，辛苦你喇」

曾兩奪金像獎最佳男配角的廖啟智（智叔）上月不敵癌魔離世，終年67歲。今日智叔家人為他安排於尖沙咀聖安德烈堂舉行安息禮，儀式下午兩時許舉行，逾30傳媒中午已到場守候。由於疫情關係，安息禮不設公祭，大眾可於安息禮直播頻道同步追思，亦可於紀念網頁上發文悼念。

{{hket:inline-image name="09ac4951e33ddf4e480c26221cac610f.jpg"}}{{/hket:inline-image}}

香港電影工作者總會發言人田啟文一早到場幫忙打點，問到總會有否幫忙安排？他說：「冇乜嘢安排，成個儀式都好簡單，因為家屬方面希望由智叔兩個囝囝安排打點，一切從簡都係跟番教會儀式去做，儀式會閉門進行，家屬都一早嚟到打點。（智叔太太陳敏兒心情？）OK嘅，冇乜嘢，佢都好堅強。（儀式有冇環節紀念智叔？）唔清楚，今日都係嚟幫手，都應該有生前點滴片段播出。」

{{hket:inline-image name="b89201af-6da2-4ebc-9add-57d52eca345e.jpeg"}}{{/hket:inline-image}}

安息禮上，敏兒錄製短片，講起智叔生平，又講到智叔臨終前最擔心都係佢：「作為一個丈夫，佢喺病房嘅時候，時時都會捉住我隻手同我講『我好擔心你，我好唔放心你』，因為作為一個丈夫，佢好唔開心自己冇辦法完成呢個責任到最後。我作為一個妻子，我以你為榮。」

敏儀喺兩個仔陪同下同大家分享佢同智叔嘅相處點滴：「頭先我哋同智叔講，『辛苦你喇，你而家可以好好休息』，我哋好感激佢，由於佢嘅辛勞，成就咗我哋好多嘢。其實過去呢年疫情令我哋更加親密，佢冇乜工開，我哋又冇乜活動，好多時都喺屋企大家困住喺度。疫情過咗通關之後我哋（計劃）返去國內睇啲名山大川，我哋睇晒地圖排序……第一個地方去邊，結果呢個『中國夢』我哋冇辦法圓。真係辛苦命覺得佢……」

（↓點擊放大睇圖片↓）

敏儀憶起佢哋年輕時曾一同歐遊：「我哋好少休息，但自1984年入咗TVB幾年後儲到少少錢，請兩個月假，孭背囊去歐洲兩個月，嗰陣冇乜亞洲人想點玩都得，住Hostel；喺巴黎試過瞓街，我哋好慳，因為好慳先夠兩個月旅行。我哋買平機票，唔係直航，要搭廿幾個鐘飛機。因為時差，計錯數，要11號先返到香港，但我哋告假告到10號就要返工，打電話同TVB講我哋要告多一日假，點知佢話10號廖啟智有工，要拍外景。廖啟智為咗準時返到就搭直航，但我為咗慳就照原定咁轉機。到佢入閘嘅時候佢回頭望我，佢忍唔住流眼淚，見到佢咁我又忍唔住喊，機場閘口喊到淚人。好彩冇人問我佢係咪移民，如果啲人知我哋一日後就見，俾人鬧死。」

敏儀續指：「今時今日，呢個往事就提起我，原來生離死別……你哪怕知道同佢好快會重聚，你仍然會好唔捨得，就好似此時此刻。佢喺病房嘅時候，佢知自己就快離開，佢好多眼淚，好多唔捨得，佢嘅唔捨得正正係因為佢係一個好有責任心嘅人，放唔低啲仔、放唔低呢個老婆，佢同我講：『敏兒我係諗住殿後，而家要留低你，辛苦你喇』，佢唔係害怕死亡，佢真係好唔捨得我哋。我哋3個好想畀佢知道我哋好掂，我哋好照顧到自己。」

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】