Edan@MIRROR強行送吻 大叔黃德斌嚇到毛管戙

黃德斌、MIRROR成員呂爵安（Edan）及盧瀚霆（Anson Lo）等昨日為港版《大叔的愛》拍攝海報，劇集將於六月底播出。德斌將於本月30日58歲生日，Edan作狀獻吻，德斌即嚇到尷尬傻笑。

劇組昨日送上生日蛋糕為黃德斌預祝生日，在劇中飾演德斌心儀對象的Edan，扮作送上「肉嘴」，德斌立即嚇到以手擋格，又笑說：「有啲尷尬，毛管戙！」德斌十分期待《大叔的愛》，但屆時不敢重溫自己演出的HeHe場面：「始終未試過拍呢種場面，不過感動又開心，我哋亦無咀戲，只係同Edan有啲裸露親密戲。（邊方面裸露？）露腳趾囉，哈哈！」他劇透指有場戲與Edan共處一室，更會由廚房親密到浴室，問到日後會否再拍同性戀題材？他表示不介意，最主要睇角色。

德斌在劇中與Edan及Anson Lo大玩三角戀，Edan笑言昨日因經理人花姐（黃慧君）在場睇實，所以不敢真咀德斌。Edan又表示與德斌在劇中亦咀戲欠奉，Anson Lo笑說︰「可能德斌唔想被佢咀呢！」提到德斌大爆有親密戲，Edan說：「我哋最親密係我被德斌錫面珠，始終呢部係青春喜劇，唔會有情慾戲，我長期處於欲拒還迎嘅狀態！」

Anson Lo被指「變心」

Edan表示自從《大叔的愛》後，接下三、四個廣告都是跟男拍檔合作，他笑言恨與異性合作拍廣告，但又怕醜，還是跟同性合作比較不會尷尬。Edan又即場扮呷醋，「投訴」Anson Lo煞科後對自己冷淡了不少，又不回覆WhatsApp，出席MIRROR活動時，更只顧黐實另一成員柳應廷（Jer）。另外，二人明言想拍續集或電影版，如果能夠港日演員合作就更開心，但擔心演技上會被日本演員比下去。

採訪︰Pauline

攝影︰林良明

美術：顏玉玲