【聲明】港生活網站並無進行電話推廣活動

再次踏足尖東尋美食

發佈時間: 2021/04/22

記得80年代,好多人買股票而成暴發戶,錢多到要用魚翅嚟撈飯,大富豪、中國城、新花都、棕南海等夜總會,到處散發着紙醉金迷嘅氣息。當時有好多日本人嚟香港做大生意,我聽做飲食業嘅前輩講,嗰陣時啲日本人食個lunch都6位數,畀貼士都5位數,呢啲日子,真係令人回味。

唔知係咪嗰段時間真係特別多日本人喺尖東聚會,1988年,日航酒店就喺麼地道落成,而我喺嗰年亦成為咗香港小姐,日航酒店係其中做訪問影相嘅熱門地方之一。亦因為咁,我當時已經同啲泊車哥哥好熟。

但唔知由幾時開始,由減少去到絕迹尖東,已經唔記得無去尖東幾耐喇。今年一月,有人約我去尖東日航酒店嘅法國餐廳La Table食lunch傾合作。當我揸車去到酒店,之前睇住我大嘅泊車哥哥,已經升咗做管理層,有啲仲退咗休,但聽到佢哋叫我︰「陳小姐,好耐無見你嚟喇。」嗰份親切感即刻湧上心頭。

之前去日航酒店,通常只會去日本餐廳同中餐廳,無預過竟然「無心食柳柳成金」,竟然畀我食到咁好味嘅威靈頓牛柳,絕對令我喜出望外。原來佢哋嘅烹製同出面餐廳真係唔一樣,佢哋除咗用美國安格斯牛,內裏嘅秘密武器就係36年火腿,再加出邊無放嘅鵝肝,鹹香嘅味道滲入肉中。你係咪可以想像到香噴噴嘅酥皮,包住惹味又有層次嘅口味,再配埋有水準嘅洋蔥湯,真係食到我好滿足。仲有最和味嘅係有七五折。

日航酒店已改咗名,而家叫千禧新世界酒店,佢哋推出咗一個叫「嘗薈」,成為會員後,可於所有千禧新世界香港酒店餐廳或酒吧享有七五折餐飲優惠;呢個5月,法國餐廳La Table French Brasserie會參與年度法國五月美食薈,推出5道菜醇酒晚膳套餐,每位1,088港元,搭配葡萄美酒每位另加310元。

咁樣又有多啲原因吸引我再次踏入尖東了。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭