「E先生」帶挈吸金 呂爵安儲錢買樓送媽咪

男團MIRROR將於下月舉行演唱會，成員Edan（呂爵安）最近人氣旺，短期內火速拍攝七個廣告，他笑言希望密密儲錢，盡快「上車」買樓送給媽媽，認真孝順。

Edan因solo歌曲《E先生連環不幸事件》人氣急升，他昨日連同有份演出MV的林家熙（Locker）及譚旻萱（Mandy），齊齊出席腕錶活動。早前Edan在IG上載「barcode頭」引來不少回響，他笑說：「當日洗頭之後變成咁，我出po前問過妹妹同媽咪，佢哋話『好樣衰，唔好出』，但我忠於自己，估唔到大家好鍾意，like數係有史以來最高。」提到ERROR成員193（郭嘉駿）最近爆紅，又自薦做米綫代言人，可惜因檔期問題未能成事，Edan聞言即示範鄉音搶飯碗：「我啲口音都好啱！」

最近Edan密密賺錢，一口氣接拍七個廣告，他說：「無諗過首歌（《E先生》）同MV幫到自己咁多。」不過他笑言酬勞未落袋：「快則三個月，耐則半年，可能出糧後儲起先。」仿效隊友姜濤以買樓為目標？他笑說：「姜濤梗係得啦，我仲未得，不過阿媽最近都提過想買樓，我都想買層樓送畀媽咪，希望可以盡快儲夠首期。」

Locker與「翻版子瑜」了解中

同場的YouTube頻道「試當真」成員Locker，被指撻着「試當真」拍檔、有份演出《YOLO的練習曲》的「翻版子瑜」Jeannie（吳家忻），Locker說：「我仲未有能力私有化Jeannie，大家了解中，有食飯去街，都有發展空間。」而Mandy現實中已名花有主，有位圈外男友，提到她在《E先生》MV中周旋兩男之間，她笑言會揀Edan：「佢好可愛，又投入工作。」

採訪︰Pauline

美術：顏玉玲