去年零收入食老本 林敬剛跟師傅萬梓良搵食好感恩

現年50歲的無綫綠葉王林敬剛，日前在內地出席新片開鏡時，即場拜63歲的萬梓良（萬子）為師，林敬剛更獲萬子賜名「林犇」（音︰奔）。正式成為萬子徒弟的林敬剛，目前身在內地開工，他接受《晴報》訪問時透露新名字「林犇」有特別意思，亦感恩遇到萬子這位貴人︰「有師傅帶住我，係種福氣。」

林敬剛日前與萬梓良、林子聰及李嘉等，到內地出席新片《創業大贏家》開鏡，林敬剛當眾跪在地上向萬子奉上熱茶拜師，儀式完成後，萬子除了賜新名給徒弟，更送上一萬元人民幣（約1.1萬港元）大利是給林敬剛，林敬剛亦是繼周星馳、林家棟及姜皓文後，第四位萬子的徒弟。

提到突然拜萬子為師，林敬剛昨日接受本報訪問時透露︰「其實我哋好多年前喺一個場合已經拜咗師，不過儀式好簡單，真正見證人亦只得米雪姐。之後我哋一路有聯絡，但師傅喺國內多，我就喺香港，今次咁啱拍呢套戲大家撞番，師傅話想喺開機儀式上拜師，多啲人見證，所以做多次正式拜師儀式。」

新名寓意「奔向最高峰」

提到萬子起的新名字「林犇」，林敬剛指新名很有意思：「呢個名，讀音可以讀個『奔』字，師傅改咗三個牛嗰個『犇』，寓意馬奔馳要鞭先肯跑，但牛就唔係，佢永遠向前走，你唔使鞭佢都會行，所以三隻牛嗰種牛威同爆炸力，永遠奔向前、奔向最高峰，師傅想我咁樣，所以贈我呢個名。」拜師後，林敬剛將有連串計劃，在內地影視圈大展拳腳，他說︰「今年七月同明年都準備咗啲計劃，當然希望做到『有師傅有我，有我有師傅』啦，兩師徒做對手戲，咁我可以乘機偷師嘛！」

雖然將事業重心遷移到內地，但林敬剛強調自己仍是TVB藝員，去年雙方已簽訂新約︰「我上年六月簽咗新約，轉咗一個騷一年後無咗月薪，簽一個騷做幾多計幾多，之前仲爭少少公司啲騷未還晒，所以去年六月到今年一月所拍嘅嘢都係還，亦無收入，肉酸啲講句靠老本，所以迷茫啲。」幸好這個時候拜萬子為師，在師傅的帶挈下，機會接踵而來，難怪林敬剛表示︰「萬子師傅係我貴人，有師傅帶住我，係種福氣。」

撰文︰倪小珊

美術︰梁政敏