見阿伯倒臥地上，你會……

前兩日揸車返屋企途中，喺土瓜灣塞紅綠燈之際，突然見到有位大約60、70歲阿伯倒臥行人路上。旁邊有4、5個人，竟然無人扶起佢。我仲見到有個男人行近阿伯差唔多一呎範圍，喺褲袋攞出手機，近距離一直拍住嗰位狼狽無助嘅阿伯。

我嗰股「有無搞錯」嘅怒氣衝上心頭，即刻女車神上身，由最開面嗰條行車綫，cut到入去第一條近行人路嗰條乘客上落車綫，車都未熄匙就衝去幫手，同兩位路人夾手夾腳扶起嗰位伯伯。而嗰個揸住手機男人，完全無幫手不特止，仲一味喺度影！我即時怒火中燒，指住佢問︰「有無搞錯？寧願行到咁埋喺度影人，都唔走去扶起人？乜嘢人嚟㗎？」佢話佢自知唔夠力扶起阿伯，於是索性影低過程。

聽完佢嘅回應我真係想噴飯。講到噴飯，即刻諗起我唔記得戴返個口罩，危險呀！立即9秒9衝返去架車度攞嚟戴。

言歸正傳，其實當時行人路上起碼有5、6個人，但係只得一位男士上前幫忙扶起阿伯，我無權指摘路人冷漠，人皆有惻隱之心，睇到呢一幕其實會唔會大家都想扶但不敢扶，原因係乜呢？

原因一︰因為疫情，大家都驚近距離同陌生人接觸？原因二︰喺內地遇到老人跌倒，大家都有「扶定唔扶」嘅選擇困難，事關昔日曾多次發生老人被扶起後，救人者反被說成是肇事者，遭對方要求巨額賠償，做好事的人反而要付出代價。

會唔會因為呢啲原因，而導致呢個社會嗰份溫暖人心被狠狠壓制呢？

面對陌生路人摔倒，你會點做？A︰驚慌失措，繞道而行。B︰伸出援手︰上前詢問，幫手打求助電話。C︰睇熱鬧︰用手機影低。D︰事不關己，不聞不問。

社會文明進步，但和諧同人性道德標準係咪退步咗？（本欄逢周四刊登）