姊妹淘丨蔡嘉欣羨慕陳詩欣收花向伴侶施壓 爆有米男友年年送支票賀壽好現實

蔡嘉欣雖然2019年參加香港小姐落選，不過都立即簽約無綫做藝人，本身都係KOL嘅佢除咗參與幕前演出外，仲身兼多職做老細，吸金力強。然而佢都唔太會「掩飾」自己有米嘅事實，上年手揸40萬現金去匯款並喺社交平台「直擊」，令到佢畀網民怒插炫富！不過「惹火」嘅佢都係唔多收歛，日前，佢錄影《姊妹淘》後接訪問嘅一番說話都畀人鬧爆「拜金港女」。

{{hket:inline-image name="2.JPG"}}{{/hket:inline-image}}

日前係蔡嘉欣嘅27歲生日，佢喺自己嘅社交平台大曬男友送畀佢嘅藍玫瑰，好幸福咁款！而《姊妹淘》嘅一班姊妹都為5月份生日嘅莊思敏同蔡嘉欣一齊慶祝。事後訪問蔡嘉欣講到自己嘅生日願望係可以快啲有劇拍，當主持人提到佢日前收到嘅一束藍玫瑰後，嘉欣即港女上身：「呢個係我好難得收到一紮花，你知唔知點解？（高八度）係因為情人節呢《姊妹淘》啲Group（Chat group）個個喺度曬自己另一半送嘅花（意指陳詩欣），勁誇張，跟住我咪畀我另一半睇……施壓之後我就有花收喇！」之後一眾姊妹就七嘴八舌，大叫「好嘢！有壓力！」

（↓點擊圖片放大↓）

被問及男友送咩生日禮物畀佢，蔡嘉欣答：「我啲生日全部都好現實，佢寫張支票畀我，真㗎！我年年都係咁㗎喎！都有五位數字嘅！」蔡嘉欣解釋，男人好多時買嘢都唔多啱女人心水，所以就折現畀佢自己買自己喜歡嘅生日禮物。此話一出，全場姊妹嘩嘩聲表示好羨慕，起哄話都想收到支票做生日禮物！據知，蔡嘉欣呢名ibanker男友非常有米，亦都好肯使錢喺蔡嘉欣身上，當年為方便女友選港姐，喺將軍澳天晉租咗個月租近25,000蚊嘅單位！

唔少網民聽到都覺得反晒白眼，指聽到覺得蔡嘉欣好拜金，覺得收cheque一啲都唔值得炫耀！不過都有人撐，唔細心嘅男人買到嘅禮物的確有時會唔啱用又唔啱心水，造成浪費，折現如果雙方都接受，亦不失為一個好「禮物」。