舊老闆黎明紅館開騷 衛蘭：想聽Leon講嘢多啲

衛蘭昨日在銅鑼灣舉行小型音樂會，提到前老闆黎明（Leon）將於七月假紅館開騷，衛蘭笑言會努力撲飛，更希望Leon屆時表演「講嘢」多於唱歌，又指Leon的金句太深奧，她花了不少時間才明白當中意思。

衛蘭昨日在銅鑼灣時代廣場舉行《廣東歌101》迷你音樂會，吸引數十位樂迷到場聽歌。提到黎明相隔十年再度於紅館開演唱會，衛蘭笑言十分期待：「我好想去睇Leon嘅演唱會，公司同事已經叫我幫手撲飛，我相信都應該撲到嘅，但就唔會自薦做嘉賓。」提到Leon今次的個唱主題為「Talk and Sing」，衛蘭表示最期待Leon講金句：「我想聽佢講嘢多啲，因為佢講嘅嘢好深，其實我真係聽唔明㗎，有啲要過咗五年後我先開始明白，就算依家我都係有啲聽得明，有啲都仲係唔明。」

代表香港揚威海外

另外，日前衛蘭獲一個外國音樂串流平台選為香港區代表女歌手，她的照片更出現在紐約時代廣場外的大熒幕上。衛蘭開心表示事前不知自己獲選：「我知道中國代表有鄧紫棋（G.E.M.），聽到消息都好驚喜，希望大會係因為我把聲同歌曲而揀中我。」她希望有機會開拓外國市場：「我鍾意唱英文歌，希望可以出英文碟。不過我都希望將廣東歌帶去海外，有得揀，我會揀自己作曲嘅福音歌《鐵蘭花》。」

昨日衛蘭在迷你音樂會上獻唱四首歌，雖然音樂會只歷時半小時，但她已相當滿足：「因為我已經超過一年無做現場表演，所以真係好開心，希望有機會開音樂會。」

採訪︰Pauline

美術：梁政敏