生死有命丨陶傑經歷「死神來了」充滿戲劇性 太有「Manner」導致爭啲失救？

「香江才子」陶傑文筆鋒利、知識淵博，經常以幽默形式諷刺時弊。曾留學英國嘅佢，對英國最爲欣賞，亦學到當地人嘅「Manner」，紳士形象深入民心。而喺陶傑嘅優雅背後，就曾經經歷兩次生關死劫，令到佢「性情大變」。早前佢就上陳志雲嘅Channel分享自己嘅瀕死經歷。

{{hket:inline-image name="1.JPG"}}{{/hket:inline-image}}

陶傑憶述自己1994年喺東九龍一間報館工作：「因為每晚兩點鐘會有公司車由東九龍經土瓜灣機場隧道去佐敦，畀員工各自返屋企。架車好準時，係日本萬事。平時呢架車得3個人坐，因為係英文報嚟，所以另外兩個係紐西蘭人同美國人，而我每晚習慣坐司機位隔籬。」陶傑指當年冇法例規管戴安全帶，佢自己平日亦冇戴。

1994年9月12日凌晨，陶傑如常搭呢架車，不過當晚就有少少唔同：「有一個平時比較少搭呢架車，身形龐大嘅外籍同事上車，我就將呢個司機旁邊嘅位置讓畀佢，因為比較闊落，我就轉坐司機位後方。」當時一車計埋司機就有5人：「當年舊機場隧道過12點就變單管雙程，封咗一半維修，單管雙程就會出現迎面車。喺兩點十幾分嘅時候，幾位外籍同事突然大叫，原來迎面有一架白色Benz入錯線，轉彎嘅時候睇唔到，睇到嘅時候已經係十呎內，而兩架車都有四、五十公里時速。司機下意識即刻扭右，但司機已經撞暈，前面同事七孔流血，後面兩個同事喺度呻吟。我以為自己冇事，但郁唔到身體，左腳更已經麻木，20分鐘先有人報警，我開始呼吸唔暢順。」

（↓點擊放大睇圖片↓）

陶傑指消防員救佢出嚟時，夾住大腿骨，痛得好緊要。佢喺擔架床上聽到，肥同事被安排送去觀塘，佢同另外兩位同事就送去QE，後來肥同事不幸過身。而同陶傑一同送QE嘅兩位同事，因為不停嗌痛，一早已經獲得治療，而陶傑就一直喺一邊等；幸得一個醫生發現佢面色蒼白，先急忙搭一個手術室幫佢做手術。陶傑話自己因為Manner冇叫痛：「我哋呢啲要講Manner，嗌痛好似難民咁，我痛得嚟好忍得，冇大聲叫出嚟。」

陶傑指當時做咗15個鐘手術，當醒番嘅時候已經全身插滿喉。醫生同佢講佢哋已經盡力，要靠佢自己意志。陶傑當時感覺自己呼吸微弱、動彈不得，覺得好虛弱。佢入到ICU，完成手術3個鐘左右時已經覺得自己要走。佢當時見到眼前有大海，有一朵金色加粉紅色、好似枱咁大嘅蓮花喺海中飄浮，又聽到耳邊有人唸經文。陶傑當下知道如果自己行過去朵蓮花度，就「係咁先」，到底佢最後點捱過呢？

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】