疫下坐地起價的外傭

疫情期間好多人都驚無咗份工，佢哋卻相反，呢段期間似乎更吃香，正正係妹仔大過主人婆。講緊嘅係外傭。

因為新冠肺炎疫情持續，令好多海外傭工不能如期到港。縱使可以到港，僱主亦須安排傭工72小時內進行核酸檢測，再隔離21日，而家直頭無得嚟香港。喺太多不明朗因素下，僱主只能選擇本地完約或斷約外傭。好多快約滿嘅外傭坐地起價，要求過萬薪金。亦有斷約外傭開出「一孩家庭、無老人家、要有獨立房間等」條件，請家傭比之前更困難。

上年9月，幫我做咗18年嘅菲傭姐姐，突然同我講，佢2021年8月約滿後應該唔續約喇，因為每次我喺屋企請完客佢就好辛苦，又頭痛又骨痛，佢話佢年紀大咗，身體已經支撑唔到。我聽完佢咁講，外表雖然無乜反應，內心已一片混亂，覺得世界末日來臨。4隻狗、3隻貓再加1隻和尚鸚鵡，我哋嘅命運會變成點？好驚呀。

由嗰刻開始，即刻搵相熟中介公司幫我搵姐姐，又拜託朋友屋企嘅家傭幫我介紹，但當大家一聽到我屋企有4狗3貓1雀都表示嫌棄，令我更加恐懼。

原先我嘅計劃係姐姐8月完約，咁5月左右請到新菲傭嚟做交接，諗諗吓都係唔好咁危險，總之有愛動物肯嚟我屋企做嘅，就一於有殺錯無放過！

農曆年時我又祈禱又求財神，總之乜神我都求，畀我可以搵到外傭。果然拜得神多自有神庇佑，3月中終於比我搵到一個好鍾意動物嘅菲傭！哈利路亞！我個心即刻平安晒，更喜樂嘅係，因為有多一個幫手，原先姐姐話有人分擔工作，佢無咁辛苦，可以留低幫我做多兩年。

呢幾個禮拜有啲疫情新聞同外傭扯上關係，令我更加抹一把汗，感受到呢份驚心動魄嘅經歷，好彩我雨過天青，大步躝過！（本欄逢周四刊登）