難忘的生日 張嘉兒收藏前度溫暖牌頸巾

生日年年有，有人覺得它並非重要日子，亦有人非常重視，如果在這個特別的日子收到一份充滿心思的禮物，或是一個驚喜生日會，相信十分難忘。以下幾位藝人，都曾渡過難忘的生日。擁有幸福家庭的張嘉兒，竟然難忘舊愛送上親手織的頸巾；鄭俊弘指老婆何雁詩送的樽蓋，剛好配他日日帶在身邊的水樽，sweet到暈！

張嘉兒已婚兼育有兩名女兒，但提到難忘的生日，她即想到前度贈送的溫暖牌頸巾，她笑言不知老公會否因而呷醋！「嗰時男友特別上編織班，同埋一班中女一齊上堂學，全班得佢一位男士，佢仲同我講︰『為咗你，我跟一班太太學織頸巾！』其實我好感動，雖然佢第一次織，但係手工相當唔錯，唔會織到一個個窿窿，我都有戴出街，依家條頸巾收藏喺溫哥華屋企，都係一份紀念。」

婚前有溫暖牌，婚後亦有女兒的窩心小禮物，張嘉兒說：「個女仲細，當然唔識買禮物畀我，但係佢會親手畫生日咭，有時神神秘秘咁，其實我知佢做緊咩，但係會扮唔知，個心就梗係好sweet啦！」

美術：梁政敏

採訪︰Pauline