連詩雅︰師妹安排舊同學共聚

連詩雅（Shiga）在求學時期，是班中受歡迎的活躍分子，她說︰「14、15歲那年，有兩個感情非常好嘅女同學，喺我生日當日嚟到屋企，一入屋就叫我坐喺廳等，原來佢哋快手快腳入我睡房布置，當我入到房，佢哋將一個好似聖誕老人裝禮物嘅袋拎出嚟，裏面有好多份小禮物，我逐一拆開真係好開心。」

「另一個難忘生日，係舊年師妹黎紀君為我準備嘅生日party，原本以為只係同公司慶祝，點知佢除咗安排咗我哋兩人做spa再staycation，去到酒店打開門，我所有中學時嘅朋友都喺度。其實有好多佢都唔認識，但為咗畀我驚喜，就跟我嘅中學朋友聯絡，再安排呢個我諗都諗唔到嘅party，我前一天至約佢哋食飯，好多人都話唔得閒，我仲諗又係嘅，大家已經有咗家室同小朋友，諗住之後再補祝，點知原來大家都齊集酒店房，嗰一刻我喊到癲咗。」