Staycation短片｜張寶兒「寵壞」老公袁偉豪反應冷淡 相對無言撳電話步入「倦怠期」？

袁偉豪同張寶兒結婚半年，不時將日常生活擺上社交平台分享，非常甜蜜！早前二人仲去咗間5星酒店Staycation歎世界，兩公婆都「洗版」Post佢哋chill嘅相同片，真係羨慕死人！不過日前寶兒YouTube Channel分享佢同老公歎世界嘅「幕後花絮」，睇落就冇新婚夫婦嘅Sweet，反而相處得好老夫老妻！

{{hket:inline-image name="637678ef-2d2a-4dc1-a291-18c15e37c1ec.JPG"}}{{/hket:inline-image}}

張寶兒分享佢「寵壞老公計劃」嘅Vlog，片段嘅一開始就係寶兒自己好興奮咁執去Staycation嘅行李，之後鏡頭一轉寶兒同袁偉豪已經喺車上面。張寶兒全程都natural high，而做「司機」嘅袁偉豪被老婆問到興唔興奮嘅時候個樣非常冇癮，答：「唔興奮。」事關張寶兒一手計策劃呢個Staycation，老公連目的地喺邊都唔知呀！

{{hket:inline-image name="1.JPG"}}{{/hket:inline-image}}

張寶兒兩手揈揈只係負責拍片，袁偉豪一落車就幫老婆推埋行李，做足好老公本分。而佢哋入住嘅套房有弧形大梳化，廳房相間，仲有個超級無敵大海景，盡覽維港景色！不過之後嘅片段佢哋都冇乜用到酒店嘅設施，只係去到中菜館食好西，期間寶兒一直都好似上咗鏈咁好多嘢講，但袁偉豪就好似好攰，想專心歎好西。不過當晚張寶兒捕捉到老公臨瞓前都仲用電話睇緊佢哋多年前去日本影嘅相，有網民話袁偉豪比佢想像中更愛太太，閃到爆。

↓ 點 擊 圖 片 放 大 ↓

去到翌日，二人喺房內歎豐富早餐，之後再去食Afternoon tea，期間袁偉豪一直冇停過，低頭撳手機冷落嬌妻，張寶兒忍唔住詐嬌：「我發覺我同你真係冇咩嘢講……我哋生活真係好靜，不如我哋下次拍條片，唔好出聲嘅。」結婚冇耐就咁靜焗，莫非係步入「倦怠期」？不過都有網民話，有時身邊嗰個可以靜靜陪伴，兩個人唔出聲都冇尷尬感覺，先至係最高境界。