苦呻單身5年 方力申狂玩交友App

方力申（小方）與關心妍（Jade）昨日現身《十大傑出青年選舉2021》啟動禮，單身多年的小方在前晚無綫節目《諸朋好友》自爆有玩交友App，小方笑言節目播出後，即收到不少交友邀請：「多咗女仔add我，平時得四、五個，噚晚（前晚）有11、12個！」

向來是圈中筍盤的方力申，原來一直心急「脫單」，他自爆玩了交友App四個月，由於他以真實身份玩App，經常被網友問他是否真人。他說：「我單身咗五年，睇睇能否喺人海中眾裏尋她，試下一見鍾情嘅感覺！（緋聞女友陳瀅有無玩App？）咁唔使用App都同佢傾到偈！」他坦言《諸朋好友》的訪問播出後，多了不少女生主動add他：「平時得四、五個，噚晚（前晚）有11、12個！」

早前疑似「朱凌凌」吳偉豪的全裸沖涼短片在網上瘋傳，問小方可試過自拍沖涼片給朋友欣賞？小方笑說：「唔會，我啲嘢大家都睇過晒！」另外，谷德昭早前替小方澄清主持無綫04年奧運直播節目時，沒有跟葉璇互寸，昨日小方回應︰「我都問谷德昭點解咁遲先講出嚟，佢話一直都有講。（可有怪佢？）無！呢件事係我演藝事業代表作！」

被要求做港姐提名人

另外，小方透露日前到慣常光顧的咖啡店時，竟被要求做港姐提名人︰「有個女仔同我戴口罩影過相，之後職員話個女仔想我做佢提名人！（驚除罩唔靚女？）唔係，其實我未見過佢個樣，大家係陌生人，最後都推咗。」同場的關心妍近日義務當唱歌老師，但疫情肆虐逾一年，籌務經費亦受影響︰「之前教唱歌營運基金，但疫情後堂數減少，但有好多支出，都幾吃力，好彩有老公出心出力幫我解決問題！」她有意找朋友「揼心口」幫忙︰「我想搵龔柯允教唱歌，黃劍文就教結他！」

撰文︰Steven

攝影︰林良明

編輯︰梁政敏