30度高溫下宣傳陳瀅着皮褸驚冷親

陳瀅與歐陽震華（Bobby）昨日宣傳劇集《伙記辦大事》，二人在攝氏30度的炎熱天氣下穿長袖衫宣傳，陳瀅更穿上皮褸，認真誇張。陳瀅不擔心中暑，又解釋說︰「呢排拍古裝劇《痞子殿下》唔夠瞓，夜晚都開廠，個人好虛驚凍親，所以寧願熱啲好過凍。」她笑言在夏天拍古裝劇，除了多喝水、搽防曬、帶風扇和退熱貼外，更有一套特別的消暑方法︰「我同服裝同事講，盡量剪走戲服內層啲布，減少啲層數，有啲衫可能得番條領。」

同場的Bobby表示疫情下在家悠閒了幾個月，忽發奇想挑戰幕後工作︰「有朋友做網絡電影，問我有無興趣做監製同編劇，我入行都30幾年，想試下多方面發展。做演員係被動，但做監製、編劇會主導好多。」他計劃先寫電影劇本，自言由學徒做起︰「不過我唔係轉做幕後，我最鍾意都係演戲。」

採訪︰Pauline