陳淑蘭
陳淑蘭

主人要隔離,寵物點算好?

發佈時間: 2021/05/13

主人要隔離,寵物點算好?

近呢幾個禮拜新冠肺炎變種病毒又殺到,每隔幾日就有屋苑有確診者帶有變種病毒,涉事大廈嘅住戶就要突然被送往竹篙灣檢疫中心隔離21日。面對突如其來嘅隔離通知,我睇新聞睇到好惶恐。最驚嗰幕,就係畀我睇到有個女住客喺鏡頭側依依不捨抹眼淚,睇真啲,原來佢同隻狗道別。

救命!當我睇到呢一幕即時觸動我嘅神經,如果發生喺我身上,屋企嗰4隻狗3隻貓1隻雀點算?係咪一定要掟晒去漁護署?係嘅話我啲貓狗實九死一生。因為佢哋係裙腳仔女,時刻都要黐住人,就算瞓覺都要貼住人,我非常擔心。一諗到佢哋如果各自被困籠中,必定嗚呼哀哉。諗到呢個畫面我已經好肉赤,想喊……

其實,寵物係咪真係要送往漁護署呢?

當大家喺社交平台分享應該預備執乜嘢做走佬袋時,咁啲毛孩及寵物點算?我公器私用,即刻搵香港電台同事幫我check下,萬一遇到呢個情況可以點做?寵物係咪必須送去漁護署隔離?

同事回覆︰如新型冠狀病毒確診患者或密切接觸者受感染的處所中有貓狗,其家庭成員又同時被送往檢疫中心,有關動物可交由親友照顧,又或交漁護署檢疫觀察。

我即刻同幾組朋友夾定,萬一不幸事件發生,請佢哋分別幫我接收呢隻貓嗰隻狗。朋友見我咁緊張就話︰使唔使搞到好似幫自己安排身後事咁呀?老實講,我嘅心情真係好沉重,如果突發而無安排,我驚我會混亂到暈咗。所以,如果你家中有寵物嘅話,真係要及早有所安排。如果你嘅毛孩需要食藥或打針嘅話,預先教定朋友點照顧。最好準備埋授權書及身份證副本,以防萬一動物急需進行手術安排。

雖然而家政策已微調,同一幢大廈嘅其他住客不會被列作密切接觸者而毋須強檢,但都係做好準備,以防萬一。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭