紅顏薄命｜翁美玲開煤氣自殺36年影迷未忘 墓地雅潔溫馨自組「旅行團」遊故地

翁美玲轉眼間離世36年，當年離世時先至剛滿26歲，亦正正係佢演藝事業高峰。1985年5月14日凌晨4點左右，翁美玲被當時有傳係佢追求者嘅鄒世龍發現，喺九龍塘廣播道寓所內開煤氣自殺，送往九龍塘浸信會醫院搶救後不治，當時有報道猜測佢自尋短見係因為感情出現問題。

{{hket:inline-image name="a3x76f2133030728296.jpg"}}{{/hket:inline-image}}

雖然翁美玲離世多年，但佢嘅影迷仍未忘記，日前更自組「旅行團」重遊故地，包括去到昔日拍攝TVB節目《活力之星》同電視劇《挑戰》嘅九龍仔公園，追憶懷緬偶像；而翁美玲嘅墓地亦由前去拜祭嘅有心人打理，有色彩斑斕嘅鮮花簇擁，非常雅潔。

{{hket:inline-image name="unnamed.jpg"}}{{/hket:inline-image}}

翁美玲生於1959年5月7日，中學時隨家人移民英國，她於23歲時回港，參選1982年《香港小姐競選》，雖然三甲不入，但從此踏進演藝世界並簽訂5年藝員合約。同年翁美玲第一次拍劇並受公司力捧，飾演經典名著《射鵰英雄傳》中嘅女角黃蓉，活潑生動，劇集紅遍亞洲，被譽為「最美黃蓉」。翁美玲其他出色嘅作品包括《決戰玄武門》、《天師執位》與《夾心人》等，演技廣受推崇，入木三分。

{{hket:inline-image name="t0151a0c99f61b0c813.jpg"}}{{/hket:inline-image}}

1983年翁美玲挽著湯鎮業臂彎出席《金像獎頒獎禮》，公開戀情，外界都認為佢哋係金童玉女。惟兩人正被無綫力捧，聚少離多，曾傳出二人在化妝間內激烈爭吵，亦各自傳出緋聞。

其時有指女方為情所困，一日比一日瘦。自殺前3個月受訪時，翁美玲否認同湯鎮業感情出現問題，表示只係個人情緒有異，又話湯鎮業對佢好好；事隔兩個月翁美玲登台後返港，有指佢喺片場經常獨坐一角落淚。出事前一星期，翁美玲指湯鎮業「耳仔軟」聽咗小人講佢嘅壞話，男方會因為自己嘅學歷同家世而自卑，兩人不時嘈交；又嬲又委屈又好心煩嘅翁美玲，覺得呢段感情唔會有結果。

（點擊圖片放大）

1985年5月14日凌晨翁美玲開煤氣自殺身亡，原來半年內佢曾三度尋死。第一次因情緒激動食咗四粒安眠藥後，驚惶下自行求助於相熟醫生；第二次係同男友湯鎮業嗌交後開煤氣，朋友到訪救番佢一命；到第三次，發現佢自殺嘅鄒世龍將對方醫院，最終返魂乏術。

湯鎮業於事發當日凌晨曾到訪翁宅，但因女方曾通知夜班看更勿讓人登門騷擾，結果被拒於門外。翌日早上8時許，鄒世龍因無法找到翁美玲，前往其寓所發現屋內傳出煤氣味，拍門冇人回應後撬窗爬入屋，發現翁美玲倒臥大廳昏迷，全身冰凍。現場冇發現任何遺書，湯鎮業於早上9時接到通知，趕抵醫院後聞噩耗，痛哭失聲。

外界盛傳湯鎮業係導致女方自殺嘅罪魁禍首，男方受盡千夫所指，漸漸隱退；多年後佢接受電台訪問時表示：「天有眼，挫折讓自己人生更加豐富、更加檢點、更加積極。」

{{hket:inline-image name="2632e09b6fc12be3920a101ec3a72042.jpg"}}{{/hket:inline-image}}

另外，翁美玲前度外籍男友Rob喺2012年為佢開設網站，定期上載有關翁美玲嘅報道同珍貴舊照，令觀眾和粉絲都可以網上懷念她，網站至今仍有更新。