【聲明】港生活網站並無進行電話推廣活動

為老公甘願叫停大型演出 莫文蔚︰做埋最好一次就完

發佈時間: 2021/05/14

莫文蔚(Karen)下月假紅館舉行最後一次大型演唱會,多年來都是工作狂的Karen,對於作出如此重大決定,除了疫情下學懂享受生活,最大原因是因為老公Johannes「詐型」,令她不能不妥協,做個「愛相隨」的好太太。

莫文蔚最近積極籌備《絕色莫文蔚世界巡迴演唱會香港站》,相隔16年再踏上紅館舞台,卻宣告這是她最後一次大型演出,不少歌迷大感失落;但向來「走得前」的Karen,坦言此時此刻結束,正是最好的moment。她說︰「其實18年開始做巡迴演唱會時,已經計劃緊喺自己『屋企』(香港)做最終極嘅大型演唱會,覺得可以喺呢個位停落嚟,之後做第二啲嘢。我份人一向唔鍾意做死一樣嘢,去到唔同階段,又會有新靈感帶畀觀眾,同埋呢十幾年我一個接一個巡迴不停唱,模式都係一樣,我覺得喺我最得心應手嘅時候,做埋最好一次就完喇!」

感謝另一半遷就

問下月踏入51歲生日的Karen是否退休?她反應甚大說︰「咁又唔會!我咁鍾意表演,但可能會調整節奏,唔再一味衝。我都結咗婚九年,嚟緊第十年,好似一直都係永遠將工作擺第一、家庭擺第二,咁樣唔係幾啱,要平衡番啲。就算我幾熱愛工作都好,唔代表我日日要去跑騷,可以用唔同方式去做我喜愛嘅工作。雖然未諗新目標,但我覺得現今嘅VR(虛擬技術)好創新,希望應用喺音樂或舞台表演上。」

Karen與老公結婚多年但聚少離多,問到老公是否有向她詐型?她笑笑口表示︰「都有㗎,都詐詐哋㗎,但我扮聽唔到咋!哈哈!其實佢真係好遷就我,但我又側側膊咁囉!佢知道我好熱愛工作,不過依家開始有共識,可能個人經歷唔同咗,自己心態又有轉變,節奏會配合得好啲。」

性感戰衣「嘩」一聲

提到今次演唱會,Karen表示rundown有一半歌曲是廣東歌,有些更從沒唱過現場。Karen的個唱服飾一向前衛,她透露今次的戰衣幾乎都是全新,她興奮透露︰「我啲演唱會歌衫,性感就梗㗎啦,已經唔係咩驚喜,但有一、兩個look係你哋唔會諗到嘅,總之一開場就會『嘩,唔係呀?』嘅反應。(邀請嘉賓?)會呀,好多人想請,但依家唔講住,講咗出嚟就無晒驚喜。」。

髮型︰Kenki @W Workshop

化粧︰Ling Chan @Ling Chan Makeup

形象︰@yoyokwans

@fameglory

撰文︰倪小珊

美術︰梁政敏

攝影︰Alma

為老公甘願叫停大型演出 莫文蔚︰做埋最好一次就完

Karen在18年的台北個唱上,拖住老公甜蜜上台,掀起全場高潮。(資料圖片)

為老公甘願叫停大型演出 莫文蔚︰做埋最好一次就完

Karen的舞台造型百變,總會令人眼前一亮。(資料圖片)

為老公甘願叫停大型演出 莫文蔚︰做埋最好一次就完

Karen和麥浚龍近日合作出新歌《因一個人而流出一滴淚》,令樂迷大感驚喜。(資料圖片)