息勞歸主│陳積榮不敵肺癌離世終年38歲 孫慧雪：一世都不會忘記你

前無綫藝人陳積榮（Jeff）近半年都與肺癌博鬥，經歷過電療、標鈀藥、化療等不同的治療，雖然辛苦，但仍然堅強面對。直至今日，其家人在Jeff的社交平台公布死訊。「感謝大家的愛，Jeff於今晨在親人的陪伴下，已暫別我們回到天家。Jeff是一位溫柔的勇士，他勇敢堅毅，一直奮戰到最後，他曾說：『我好幸運身邊有很多朋友去陪我戰鬥，無論我戰勝與否，都希望用我的力量豐富大家！』現在他已不再痛苦了！再一次感謝大家一直以來的支持及鼓勵！他的愛和精神會一直長存我們心裡！另外，希望各位傳媒朋友，在這段時間給予Jeff最愛的家人一點空間！永遠懷念」

東張西望│陳積榮消瘦露面自嘲似外星人 「半個肺白晒 化療成功率僅4成」【下一頁】

{{hket:inline-image name="186996383_264579701766798_7695415413335775538_n.jpg"}}{{/hket:inline-image}}

Jeff去年8月不幸確診第四期肺癌，當時醫生診斷他最壞情況或只剩下半年壽命；但Jeff積極面對，並在網上拍片發起眾籌籌集醫藥費，幸好獲得演藝界及香港市民的大力支持，當中包括郭富城、馬浚偉、文雪兒、陳自瑤等都有以身作則捐錢以表達支持，令Jeff的經濟情況暫時紓緩，可以專心接受治療抵抗癌魔。

（↓點擊放大睇圖片↓）

藝人相繼施援手︳郭富城捐10萬以支持對抗癌魔 陳積榮感動：想當面多謝大家！【下一頁】

Jeff先後接受兩次化療，由於副作用嚴重，見他身形消瘦兼頭髮脫落，但他仍然樂觀積極去面對。本月初，Jeff接受《東張西望》的訪問，Jeff曾表示「半個肺已白晒」、「化療成功率只有4成」，但他多痛苦都拼命求存。在藝員訓練班同期的好友孫慧雪、謝珊珊和鄧永健都有現身探望，全力支持他，希望他康復後可以繼續一齊拍片。可惜，好友們未能如願。孫慧雪在社交平台都有撰文紀念Jeff這位老友，內容如下：

Jeff, 和你實在有太多太多的經歷，
一起追夢的過程，
實在太深刻了！
所以我呢一世都不會忘記你！

你好叻呀！
一直撐到現在不容易，到最後，
你都仲係擔心人哋為你傷心，
怕自己令人失望！
其實你已經好叻好叻！
好硬淨呀！撐咗咁耐，
要好好休息吓啦！

經常在想，
點解上天要揀你？要帶你走？
一定係你太好啦！
你已經完成咗天主俾你喺人世間嘅考驗，
你可以幫佢手做事啦！
或者因為你特別勇敢，
可以令我哋明白更多！

認識你嘅人，
都知道你個性坦率、正能量，
每次見你，總係有滿滿嘅計劃，
每次都係充滿希望同力量！

知道自己發病嘅時候，
你同我講話你知道自己行緊運啦！
係上天俾你一個經歷同考驗，
只要過咗呢關，
之後就可以繼續努力完成，
好多好多你想要做嘅事，
你話實在有太多人對你好，
你好想還俾大家，
好想用自己力量幫忙同鼓勵病友，
喺你病同唔舒服嘅時候，
你都係咁為人著想！

你教我人生健康係最重要，
無需要為唔值得嘅人，
或唔值得嘅事而唔開心，
你教我每一個演出都好應該要珍惜！
就算只係行過嘅角色，
你都會好珍惜！
你話人生唔需要追求物質，足夠就好，
你話細細個赤腳喺士多跑來跑去，
過一啲簡單生活都已經好開心，
你話人生好短，一定要追夢，
要努力成就想做嘅事，等自己無悔！
你話愛要說出口！
我全部都記住啦！

你成日讚我叻，我知道你鼓勵我，
其實你叻我好多好多！
喺你身上我學到好多，

你令好多嘢由零變一百，由無變有，
你令我明白敢想敢做，
就會令事情發生！

你重情，拍電影，都要堅持搵返同期嘅訓練班同學，
你好喜歡齊心做一件事嘅感覺，
多謝你俾左好多美好回憶我！
俾我做電影女主角！

細數我人生每個精彩時刻，
都有你喺身邊陪伴同見證！
好開心認識你！
而家只係短暫離別，我哋來日再聚！

喺呢度衷心多謝一直出心出力愛護Jeff嘅大家！
我哋會忘記悲傷，重新振作！
因為你唔鍾意見到我哋唔開心！

Jeff, we love you!

而鄧永健都留言說：「兄弟，你知我不嬲都唔識點講嘢，不過每次見面撞橋吹水，再由不可能變成奇蹟，一關一關咁過，我地都成功完成咗好嘢，雖然今次奇蹟無出現，不過你已經好叻仔，好勇！淨低嘅會盡做，放心！好好休息吓，遲啲再見Love U Bro！」

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】

責任編輯：楊安莉