晚吹—又要威又要戴頭盔｜前無綫編劇爆有男主角曾擅自改戲 蕭正楠：劇本有少少微調好正常

由林二汶和余迪偉主持的ViuTV節目《晚吹—又要威又要戴頭盔》，最新一集請來3位電視及電影圈的編劇分享行內情況及工作經歷，當中前無綫編劇阿茄更力數大台六宗罪！

{{hket:inline-image name="viu4.png"}}{{/hket:inline-image}}

26歲的阿茄本身讀建築，於2016年入行做編劇。他指因自己有興趣講故仔，所以當年見到電視台公開招聘時，便寄自己寫的劇本去應徵，獲公司睇中後入行。不過他在大台做了3年多，遇到不少不愉快的經歷，愈講愈嬲的他，最後更除了頭盔現真身，力數前公司六宗罪。

{{hket:inline-image name="viu.png"}}{{/hket:inline-image}}

阿茄指很多時明明不是編劇工作範圍的事情，也要編劇去做，如劇中道具都要親手製作。他舉例指有次拍攝古裝劇，編劇除了要「負責」寫皇上奏摺上的字外，就連佈景中的橫幅、揮春及墓碑都要寫。阿茄指編劇本身已要處理劇本，「分唔到身」處理道具。

{{hket:inline-image name="viu3.png"}}{{/hket:inline-image}}

阿茄又指除了兼任做道具組工作外，更要化身「小編」，為觀眾解釋劇情，他指：「有一次有個劇集出街，觀眾對啲劇情有疑問，或者有啲取笑又好，監製睇完後覺得我哋有必要解釋吓，其實我哋個劇情係想咁樣咁樣，最後要我哋啲編劇幫佢開個facebook page，以呢個劇嘅名義咁樣，解釋返畀啲觀眾聽，其實我哋啲劇情咁咁咁嘅，但其實呢啲嘢應該marketing嗰邊做嘅。」不過編劇就算有不滿，都只會忍氣吞聲，照跟order做，更會被迫OT。

{{hket:inline-image name="viu6.png"}}{{/hket:inline-image}}

另外，阿茄又指因要遷就廠期，他們曾被迫在一個月內「嘔」二十集劇本：「試過一個case係個監製個廠期已經定咗好耐，都搵咗好多編劇埋班度，度咗幾個月都要推倒重來，因為高層嗰度就有啲拗撬，臨急抱佛腳先至搵我哋返去做。我哋條team講緊一個月入面要出20集劇本，呢個基本上係冇可能嘅事嚟，而因為呢個咁special嘅case，最高峯嘅時候條team係有12、13人返工，都係非常之趕！所以每日返工就係要『飛紙仔』畀啲演員，咁啱我哋今日個廠期係拍男主角個廳，就死都要嘔啲戲出嚟畀男主角喺個廳度做，就不斷係日復日發生呢啲情況。」

{{hket:inline-image name="viu8.png"}}{{/hket:inline-image}}

阿茄指編劇要就廠期「嘔」劇本都不得止，更可能遇上演員自己擅自改故事及改對白！他說：「曾經有個男主角改咗個稿出嚟，我哋編劇反而要上去佢個google drive度download佢份演員稿，先知原來個劇情走向變咗！」他續說：「故事本身係想鋪排男主角嘅情緒，遇到佢媽媽死咗同埋工作壓力好大，情緒打算推到後面先一次爆發，點知男主角收到劇本之後問『阿媽死咗我唔喊咪無嘢演？』，而嗰場戲本身係想男主角表現好堅強，到正式拍攝時，男主角突然大叫『阿媽你死得好慘，我細個偷嘢……』無啦啦自己作咗個身世出嚟。」結果由於男主角改戲，一班編劇被迫放棄之前的鋪排，「要就返男主角版本去改動。」

{{hket:inline-image name="viu10.png"}}{{/hket:inline-image}}

阿茄又指香港電視台的編劇最大壞處是不能跟場拍攝，跟整個製作好像切割了一樣。如在電視台頒獎禮中，演員們得獎時會多謝很多幕後人員，但多數無編劇份。「其次就係去到煞科宴咁樣，成個crew、project嘅人喺晒度，但係就冇人識我哋囉，我哋就坐埋一角，自己圍內食飯。」

{{hket:inline-image name="viu9.png"}}{{/hket:inline-image}}

最後阿茄在節目尾聲無奈表示香港編劇在作品的credit（鳴謝）也出現「落唔足」的情況，如在作品的海報中，很難才找到編劇的名字。

（↓點擊放大睇圖片↓）

身兼編劇的農夫成員C君受訪時提及到除了演員外，因應拍攝需求，導演、監製、美術及場務都可能會改劇本，「原來真係好多人會改你嘅劇本。」不過他就指自己改得最多是自己的劇本，又言改劇本的出發點是想讓事情變得更順利。而陸永就指改劇本好正常。

{{hket:inline-image name="vsdv.jpg"}}{{/hket:inline-image}}

另外，蕭正楠也指拍攝期間若見到劇本演得不順，微調劇本是正常的事。「演員有時候喺現場對劇本有少少微調係好正常，因為有時只有你自己先知自己角色性格係點，有啲對白，演員喺現場對過一次，覺得有咩唔順就改一改。」又會在導演嘅同意嘅情況下改。提到有男演員曾擅自加跪地喊戲，蕭正楠笑言︰「如果呢個情況，我一定唔會加自己戲，反而會改短。」他又笑湯洛雯最喜歡改劇本，女方即否認：「我點會，我咁鵪鶉！其實演員好少大改劇本，改少少就會。」而馮盈盈則表示拍劇經驗尚淺，唔夠膽改劇本，自己亦沒有見過改劇本的事情發生。「有新諗法都會成班人同導演商量。」

{{hket:inline-image name="45bee9e706c64e0f7303f7ebe53ded8e.jpg"}}{{/hket:inline-image}}

{{hket:inline-image name="c04a7608368f362f231ae66f6fbf12a9.jpg"}}{{/hket:inline-image}}