孖小鮮肉拍廣告 薛家燕回春開心流口水

薛家燕將於本月底榮升做嫲嫲，雖然她打算休息，等待乖孫出世，但她身為廣告寵兒，仍有不少廣告邀約。最近家燕姐接拍飲品廣告，由兒子石耀庭（Jackson）執導，Jackson更請來六呎高小鮮肉做男主角，雖然家燕姐沒有跟型男拖手仔，但不乏眼神交流，家燕姐更自爆不停「流口水」！

薛家燕在廣告中與型男Daniel合作，二人更撑枱腳飲果汁，問家燕姐可有回春感覺？她笑說：「Daniel有型又識做戲，因為廣告要表情十足，佢又做得幾好，睇番playback發覺我哋幾襯，我直情成個青春晒。」可有跟Daniel拖手仔？家燕姐搞笑說：「佢個眼神呢…我流口水呀，我哋眼神好多接觸，手仔就應該無掂到！」她坦言因疫情關係，與圈外男友已很久沒「拖手仔」：「我哋天各一方，惟有靠手機同電腦傾偈，希望可以快啲拖到手仔啦！」

「投訴」兒子執導要求高

另外，拍攝期間家燕姐要狂灌果汁落肚︰「起碼飲咗三支，搞到成日去廁所，但我本身鍾意飲果汁，拍完剩番啲我都唔捨得倒咗去，留番之後飲，所以愈飲愈多！」今次跟Jackson再次母子檔合作，家燕姐有感Jackson的要求一次比一次高︰「今次拍得幾開心同順利，Jackson一早做好晒準備功夫，所以準時收工。不過佢要求好高，上次要我做Captain Nancy打成十幾20次，今次佢嫌我飲果汁飲得唔靚，話要做啲誘人動作，我都唔知點解要誘人，所以要問下監製（大女石祐珊），佢兩個度好晒，有晒storyboard，話係客戶要求喎。」

撰文︰Pauline

美術：梁政敏