細佬承諾生性做人 吳若希感動爆喊派洋蔥

吳若希（Jinny）早前開設個人YouTube頻道，除了出賣自己老公何兆鴻（Alex），前晚更邀請細12年的胞弟吳梓楓（Carson）對談。Carson大讚家姐Jinny愛錫家庭外，更透露得知家姐懷第一胎時，一度擔心以後只剩下自己孤身一人，兩姊弟更真情流露爆喊，十分感人。

吳若希向來出名愛錫家人，前晚她上載與胞弟Carson真情對話的短片，只見Carson樣子甚有韓國小鮮肉氣息，臥蠶和笑容都跟家姐非常相似。兩姊弟感情相當要好，更互爆拍拖次數，當他們形容對方時，Jinny笑指細佬「靚仔」，而Carson則大讚家姐︰「對屋企好好、對我好好、好愛我、好錫我！」

從小互相陪伴

Carson坦言從小並非跟父母同住，幸好有家姐相伴︰「中學派位，我被派到一間好好嘅中學，見到其他人都即刻同父母分享，但我當時只係自己一個返屋企，好彩夜晚有你陪我傾偈，令我感受到原來有人關心我，而唔係我一個人流浪咁。」Jinny亦指兩姊弟的死穴都是「家庭」，她未結婚時，每當生病或不開心，都有細佬陪伴和照顧，令她倍感溫暖，更有動力撑起頭家。

另外，Carson主動解釋當他知道Jinny懷第一胎時，為何不停哭泣︰「因為當時你（Jinny）係我最在意嘅人，家姐有自己嘅家庭，係咪代表以後我都一個人？我只知自己要更加獨立，好驚自己做錯啲咩影響到你嘅生活，就算第時我無乜出息，我都一定會好好做人，唔好令家姐擔心。」Carson說着更流下男兒淚，Jinny雖然抱住細仔，但仍激動爆喊︰「我知你（細佬）好生性，突然講呢啲，講到喊。」姊弟真情流露，獲得網友一致讚賞，大讚Carson懂事，Jinny亦是個負責任的好姐姐。

撰文︰Iris

美術︰梁政敏